Islamisk Statimeersorineqartut Tyrkiami poliinit tigusarineqartut

Tyrkiami politiit immikkut sungiusakkat illoqarfinni Izmirimi Istanbulimilu pakasaallutik misissuinerminni inuit ikinnerpaamik qulingiluat tigusaraat.
Assi © : Irene Ovadia/Flickr Creative Commons
Allattoq Ritzau
juunip 30-at 2016 07:18
Nutserisoq Simon Uldum -

Tyrkiami oqartussaasut illoqarfinni Izmirimi Istanbulimilu pakasaallutik misissuineranni inuit ikinnerpaamik qulingiluat tigusarineqarput. Naalagaaffiup nutaarsiassaqartitsivia Anadolu Reuters naapertorlugu taama ilisimatitsivoq. Nutarsiassaqartitsiviup paasissutissat sumit pissarsiarisimanerai erseqqissumik nalunaarutigineqanngilaq.

Tyrkiami politiit immikkut sungiusakkat Istanbulip illoqarfiata immikkoortuini pingasuni ullaaq manna pakasaallutik misissuipput. Taakku qanoq kinguneqarsimanersut suli nalunarpoq. Tamatumunnga peqatigitillugu inuit qulingiluat illoqarfimmi Izmirimi tigusarineqarsimapput. Anadolu taama ilisimatitsivoq.

Aamma atuaruk PISUT Istanbulimi timmisartoqarfissuarmi saassussineq pillugu ilisimasavut

Aamma atuaruk Istanbulimi timmisartoqarfissuarmi qaartartumeerisoqarnerani 50-it missaat toqutaasut

Anadolu naapertorlugu inuit tigusarineqartut Islamisk Statimut attuumassuteqartutut pasineqarput. Inunnullu Syriamiittunut attaveqartarsimasorineqarput. Tigusarineqartut Islamisk Statimut aningaasalersuisutut, ilassarsiornermut pilersaarusiornikkullu ikiusisimasutut pasineqarput.

Inuit pingasut imminnut pilliutigitigalutik Istanbulimi timmisartoqarfissuarmi inuit 43-it toqutsillutik qaartartumeerinerisa kingorna politiit tigusarinnipput.

Saassussisut Tyrkiami USA-milu oqartussaasunit tassaasorineqarput Islamisk Statimik illersuisut imaluunniit attaveqateqartartut, nutaarsiassaqartitsivik Reuters taama allappoq.

/ritzau/Reuters