Isikkamik arsaanneq: Nunanut allanut unammisartut nakkutigineqalersut
Nunanut allanut unammisartunut toqqagaasimasut sungiusarnissaminnik pimoorussinissaat qulakkeerniarlugu angutit arnallu nunanut allanut unammisartuisa sungiusaasui timersoqatigiiffiit timersoqatigiiffinnilu sungiusaasut ingerlaavartumik attaveqarfigisarpaat.
- Angutit arnallu nunanut allanut unammisartut tassaasussaapput ukioq naallugu sungiusartartussat. Taamaammat unammisartut sungiusarnissaminnik paarsilluarnersut nakkutiginiarparput, angutit nunanut allanut unammisartut sungiusaasuat Rene Olsen KNR.gl-imut oqarpoq.
Angutit arnallu nunanut allanut unammisartoqatigiivinut toqqaasoqareerpoq. Aappaagulu juunip qaammataani Bermudami Island Gameseqarnissaanut nunanut allanut unammisartoqatigiinnik upernaap ingerlanerani toqqaasoqartussaalluni.
- Nunanut allanut unammisartut sungiusarnerminnik paarsilluarnersut paasiniarlugu timersoqatigiiffinni sungiusaasut januaarimi attaveqarfigiortortussaavagut, Rene Olsen oqarpoq.
Illup iluani isikkamik arsaalluni nunatsinni pissartanngorniuunneq marsip qaammataani ingerlanneqartussaavoq, tassanilu arnat angutillu nunanut allanut unammisartut sungiusaasuisa unammisartut nakkutiginiarpaat.
Unammisartut Danmarkimiittut aamma nunanut allanut unammisartut siornatigut sungiusaasorisimasaannit Jens Tang Olesenimit malittarineqarput.
Unammisartoqatigiit 18-inik unammisartoqartut marlussunnillu taartissamaateqartut marsip qaammataani apriililluunniit aallartinnerani toqqarneqassapput.
