Isiginnaagassiaq nuannarineqartoq

Isiginnaagassiaq nipilersoqatigiinnut 70-ikkunneersunut tunngasoq isiginnaarianik pikkusutsitsisoq eqqarsaatissiisorlu filmit naanerani tusaaneqarsinnaavoq.
Nunatsinni politikkerit nuimasut isiginnaagassiaq naammat naapilaarpagut oqaaseqartinniarlugit.

- Nuanneq, tupinnaq, torrallatarsuuvoq, Jens Erik Kirkegaard oqarpoq.

- Pikkusuttarlungalu aliasullunga qiasarlunga illartarlungalu pissatsisimaartarlungalu eqqarsalersinneqarlungalu, Aleqa Hammond oqaluttuarpoq.

- Naggasiutigineqarpoq suli sorsutassarpassuaqartugut naalakkersuinikkut aamma inuttut. Aamma naammineertutut inuit misiginissaat pingaartupilussuusoq. Isiginnaagassiaq soorunalimi aliannaarnaqaaq, Kuupik Kleist nassuiaavoq.
   
Erinarsortartup Nunatsinni ilisimaneqarluartup isiginnaagassiaq takugamiuk imminut qiviarpoq.

- Nipilersornerup silarsuaaniittuulluni assut eqqarsajallannarpoq. Ullumikkut nipilersortartut suppat? Suut taalliarineqartarpat? Sunalu angorusupparput, Kimmernaq Kjeldsen oqarpoq.

Aviisimi Sermitsiaq-mi aaqqissuisup Poul Krarupip isiginnaagassiap naanera immikkut maluginiarpaa, qanorlu oqariartuuteqarnersoq eqqarsaatersuutigalugu.

 - Isiginnaagassiap naanerani nunami pissutsit allanngorsimanersut apeqquserneqarpoq, tamannalu pisimanngitsoq oqariartuutigineqarluni, Poul Krarup taama oqarpoq.