Isiginnaagassiaq "Nalusuunerup taarnerani"

Kalaallit nukittuujusimapput namminersortuullutillu - taamaattunngoqqissinnaallutillu.
Assi © : Nalusuunerup Taarnerani
marsip 15-at 2016 17:08
Nutserisoq Erna Lynge

Nipilersugassiami isiginnaartitsissutaajutigisumi tusarliukkusutaq taama imaqarpoq. Tassani kalaallit isiginnaartitsisartut pitsaanersaat peqataapput.

Isiginnaagassiami sammineqarpoq siulitta qallunaatsiaanut 1400-kunni pikititsinerat atuakkiortutta Villads Villadsenip taalliaanik tunngaveqartoq.

"Nalusuunerup taarnerani" maannakkorpiaq inaarsarneqarpoq.

Isiginnaagassiami tunngavigineqarput siulitta qallunaatsiaanut sorsunnerat Villads Villadsenip 1930-ikkunni taalliai aallaavigalugit. Ilitsersuisartup Sananda Solarisip isumaa naapertorlugu taallat tamakku erlinnartuutaapput arajutsineqarsimasut.

- Shakespeaerip Lorcallu pissanganartuliortartorsuattalu pingaartitaannik piginnaasaannillu taallat imaqarput. Kalaallit saniatigut tamakku allanit arajutsineqarsimapput.

Villads Villadsenip taalliai erinarsortartup Ole Kristiansenip 2011-mi immiuteqqippai ilisimaneqarteqqilerlugillu.

Tamannalu pingaaruteqartoq Nukâka Coster-Waldau isiginnaartitsinermi peqataasoq isumaqarpoq. Taanna nammineq ukiualuit matuma siorna Villadsen pillugu uisinneqarsimavoq.

- Kalaallip kialuunniit imminut ataqqisup Villads Villadsenip taalliai ilisimasariaqarpai. Uangali ilisimanngikkaluarpakka. Isumaqarpunga 1930-ikkunni allagaasimaneri assut naleqquttut pissanganarluinnarlutillu.

Taalliat siulitta peruttulerneranneersuupput, aammali pissaanernut avataaneersunut oqaaqqissaarutaallutik.

- Tassaapput tamakku Villads Villadsenip uatsinnut oqaatigiumasai: Eqqaamaniarsiuk taamani susoqarsimanersoq. Oqaluttuarisaanerput ilisimasariaqarparput. Nukivut ilisimasariaqarpavut. Isumaqarpungalu tamakku assorsuaq iluatsittumik taallani taakkunani ersersinneqartut. Tulluusimaarutissaq pingaaruteqartoq isumaga malillugu ersersikkaat, Nukâka Coster-Waldau oqarpoq.

Peqataasoq alla Mike Thomsen isumaqarpoq Villads Villadsenip taalliai ullutsinni pissutsinut sammisorujussuusut.

- Isumaqarpunga ullutsinni Nunatsinni nammineq aalajangiisinnaanerput eqqarsaatigalugu nuannersunik eqqartungassaqanngiffitsinni taallat pingaaruteqartut. Naak pappialatigut namminiilernissatsinnut arlaatigut aalajangiisoqarsimagaluartoq ulluinnarni malugigassaanngitsoq Mike Thomsen oqarpoq.

Mike Thomsenip Nukâka Coster-Waldauillu saniatigut Karina Møller aamma Ujarneq Fleischer peqataapput.

Isiginnaagassiaq Sjællandip qeqqaniittumi Sonnerupgaard Godsimi isiginnaartisisartoqatigiit Teater Inuit sungiusarfigisaanni martsip 16-ianni isiginnaagassiaq takuteqqaarneqassaaq.

Martsillu 21-anniit sapaatit akunnerini pingasuni isiginnaartitsisartoqatigiit isiginnaagassiaq Nunatsinni isiginnaartitsissutigeqattaartussaagaluarpaat. Angalanissarli allaaserisap matuma saqqummersinneqarnerata kingorna kinguartinneqarpoq.