Isiginnaagassiaq isiginnaariarluarneqarsimasoq takutinneqaqqissaaq

Nuummi siorna kulturikkut pisoq ussanneqaqisoq silami isiginnaagassiarsuaq ateqartoq "Toqqortat", Nuummi Nunat Avannarlermiut kulturikkut 2015-imi festivaleqarneranni takuneqaqqissinnaalissaaq.
oktobarip 07-at 2015 14:14
Nutserisoq Erna Lynge

Isiginnaagassiaq Nuummiut tusindilikkaat siorna Nuutoqqamut isiginnaariaasimavaat.

"Toqqortat" suliaavoq eqqumiitsulioriaatsit assigiinngitsut atorlugit, kalaallit oqaluttuariaasaannut nunani avannarlermiut ilaatigut Finlandimiit, Islandimiit, Norgemiillu pisut isiginnaartitsipput.

Isiginnaartitsinermi inneq atorneqarpoq, silaannarmi isiginnaartitsinerit, siku, quiasaarisartut, cirkusimi isiginnaartitsisartut, silaannarmi timi atorlugu takutitsinerit qummoroortartullu atorneqarlutik.

Nunatta Isiginnaartitsisarfiata matut tamanut ammassavai, akeqanngitsumik isiginnaagassiaq takuneqarsinnaanngorlugu. Isiginnaartitsisarfiummi isiginnaagassiap tamarmi immiunneqarnissaa isumagisimavaa, taamaattumik isiginnaarneqaqqissinnaavoq.

Nunat Avannarliit Kulturikkut festivalertitseqqaarneranni oktobarip 21-ianniit 25-iata tungaanut ingerlanneqartussami immiussat takutinneqassapput. Tassunga atatillugu Nunatta Isiginnaartitsisarfiata qititassiaq "I Wish Her Well" Panta Rei teaterip suliaa takutissavaa, aammalu savalimmiormiut taallioriaasaat pillugu saqqummersitsisoqassalluni.

Nunatta Isiginnaartitsisarfiata nittartagaani facebookimilu quppernerani pilersaarutit takuneqarsinnaapput. Nunatta Isiginnaartitsisarfiata aaqqissuussai tamarmik akeqanngillat, peqataarusuttullu akunnerup affaanik sioqqutsillutik takkuteqquneqarput.