Isertortumik qineqqusaartoqarsinnaanera Rosingip ernummatigigaa
Inatsisit tunngaviusut pillugit isumalioqatigiissitaq pillugu suliap Inatsisartut siorna ukiaanerani ataatsimiinnerisa naammasilernerani tuaviuussamik suliaqarineqarnerata kingorna, isumalioqatigiissitamut akisussaaffik pissaanerlu Naalakkersuisunut tunniunneqarpoq.
Taamaammat isumalioqatigiissitamut ilaasortat katiternissaat isumalioqatigiissitamullu malittarisassat atuuttussat Naalakkersuisunit aalajangersarneqartussaapput, tamannalu Inatsisartut Inatsiseqarnermut ataatsimiititaliaani ilaasortap Demokraatineersup Michael Rosingip ernumanartoqartippaa. Tamanna tunngavigalugu Namminiilivinnissamut naalakkersuisoqarfimmut §37 naapertorlugu arlalinnik apeqquteqarpoq.
AAMMA ATUARUK Namminerisamik tunngaviusumik inatsiseqalernermi tapiissuteqartarneq unissaaq
Inatsisit tunngaviusut pillugit isumalioqatigiissitap siulittaasoqarfimmeersuniinnaq peqataaffigineqartumik angalalluni innuttaasunik ataatsimiititsinnginnissaanik Naalakkersuisut ilaatigut neriorsueqquai. Siulittaasoqarfimmimi ilaasortaaffissat Naalakkersuisut Siumumut IA-mullu tunniussimavaat:
Frederiksen neriorsuinngilaq
- Namminersorlutik Oqartussat akiligaannik qineqqusaarnertut isikkoqarpoq, sumiiffinnummi assigiinngitsunut angalalluni innuttaasunik ataatsimiititsisoqarniarpoq namminiilivinnissaq eqqartorlugu, tamannalu qinersinissaq sioqqutilaarlugu pissaaq, Michael Rosing taama oqarpoq.
Naalakkersuisulli Michael Rosingimut taamatut neriorsuuteqarusunngillat, tamatumunngalu taarsiullugu Naalakkersuisut isumalioqatigiissitamut ima kaammattuuteqarput:
- Partiit tamarmik innuttaasunik ataatsimiititsinerni aallartitaqartassasut soorunami Naalakkersuisut kaammattuutigaat, Suka K. Frederiksen (Siumut) Michael Rosingimut akissutimini taama allappoq.
Tamannali Michael Rosingip eqqissiallaatiginngilaa, taassumami ernumassutigaa illuatungiliuttut Inatsisit tunngaviusut pillugit isumalioqatigiissitap sulinerani sunniuteqaqataasinnaanerat killileqqinneqassasoq.
Naalakkersuisut allanik toqqaasinnaannaagaluarput
- Naalakkersuisut isumalioqatigiissitami siulittaasoqarfik inuttalerpaat, tamatuma kingorna isumalioqatigiissitami kikkut aalajangeeqataasinnaanatik peqataassanersut pingaartumik Naalakkersuisunit aamma aalajangerneqassaaq.
Aalajangeeqataasinnaanatik peqataasut isumalioqatigiissitap sulinerani ikiuuttussaapput, Naalakkersuisulli peqataasussanik partiinik naalakkersuisooqatigiinnik isumaqataasunik toqqaanissaat taamaaliornikkullu illuatungiliuttut sunniuteqaqataasinnaanerinik killileeqqittoqarnissaa Michael Rosingip ernumassutigaa.
AAMMA ATUARUK Namminiilivinnissaq unammillernartoqartoq
Partiit naalakkersuisooqataasut isumalioqatigiissitami salliullutik inissisimanerisigut inatsisit tunngaviusut pillugit sulinermi Nunatta periarfissai pillugit isummanik kukkusunik siammarterisoqarsinnaanera Rosingip ernumassutigaa:
- Ernumassutiginerpaasara tassaavoq pissutsit Brexititut ittut Nunatsinni atuutilersinnaanerat, tassalu namminiilivittariaqarnitsinnik puussaarisoqassasoq, namminiilivinnerlu massakkoqqissaaq eqqunneqartariaqartoq.
Tamanna pillugu tallimanngornermi Qanoruumi paasisaqarnerusinnaavutit.
