Inuviup Tuktoyaktuullu akornanni aqqusinissaq piareertoq

Canadap Issittortaata kippasissuani Inuvialuit nunaanni illoqarfiit pingaarnersaannit Inuvimmit nunaqarfimmut Tuttuujartuumut aqqusineqarnissaa ukiut 50-it sinnerlugit kissaatigineqarsimavoq.

Ujaraaqqanit aqqusinniaq maanna naammassineqarsimavoq, pisortatigoortumillu sapaatip-akunnerata massuma ingerlanerani atoqqaarfissiorneqartussaalluni.

Nunaqavissut aqqusinniortuinnaanngillat, aqqusinniornermummi atortussat tamaanngaanneersut aamma atorneqarput, tassa atortussat Northwest Territoriesimeersut atorneqarlutik. Tamaammat tulluusimaarutissaqaqaaq.

Aqqusinniornerup missingersuutit sippornagit, piffissaliussarlu eqqorlugu naammassineqarnera tulluusimaarutigalugu, Northwest Territoriesip naalakkersuinikkut siuttuata Bob McLeodip KNR-imut oqaatigaa.

Aqqusinniaq 1,5 milliardit koruuninik akeqarpoq, sanaartorneralu ukiut pingasut sinnilaarlugit sivisussuseqarluni.