Aqqaluk Lynge: Inuusuttut suliassarpassuaqartut
Aqqaluk Lynge ilaatigut partiimik Inuit Ataqatigiinnik pilersitseqataavoq, ukiorpassuarnilu ICC-mi præsidentiulluni.
Ilaatigullu kalaallit inuiattut akuerineqarnissaannik kissaateqarnera politikkikkut sulineranut aallaaviuvoq.
- Inuusuttuunerma nalaani suut tamaasa sorsuutigisariaqarsimavagut, Aqqaluk Lynge oqarpoq.
Nunatta taamani aalajangiisinnaanera maanna aalajangiisinnaaneranut naleqqiullugu killeqarpoq, kalaallillu danskiusutut isigineqarlutik. Tamatumalu allanngortinnissaa ilaatigut Aqqaluk Lyngep taamani kissaatigaa.
- Taamaattumik Aasivik 77 aqqutigalugu ukiut 40-t matuma siorna sualummik tassani oqaaseqaatigut inuiattut kikkuunitsinnik piumasaqarneq, akuerineqarnissamik piumasaqarneq, taamanikkut aallartippoq, erseqqinnerpaamik, Aqqaluk Lynge oqarpoq.
Nunarput taamani aalajangiisartunik suli inatsisartoqanngilaq. Inuit sinniisui Danmarkimi oqartussanut siunnersortitut taamaallaat atuuffeqarlutik. Tamannali 70-ikkunni allanngoriartulerpoq.
- Taanna naammassiartuaarsimavarput, ullumikkullu namminersornerulerluta, qanorsuarlu danskit naalagaaffiata iluani qanoq iliorsinnaalluta, Aqqaluk Lynge oqarpoq.
Suliarli ukiut 40-t matuma siorna aallartinneqartoq alloriarnerinnaavoq.
- Na'aa, suli suliassarpassuit. Sorsutassarpassuaqarpugut.
Aqqaluk Lynge nangilluni oqarpoq, aalajangiisartut inoqatit naligisutut ataqqinassusilittullu pissusilersorfiginissaat pingaartoq.
Namminersulernissaq politikerinit maanna oqaluuserineqartorujussuuvoq. Sulialli aallartereersut naammassineqaqqaartariaqartut, Aqqaluk Lynge isumaqarpoq.
- Ullumikkut alloriarneq imaattariaqaraluarluni, namminersorneq pillugu inatsimmi, 2009-meertoq, sinnerisa oqartussaaffiit 30-t sinnerlugit qanoq ilillugit piviusunngortinnissaat. Taanna tassaavoq sallersaatillugu suliassaq, isumaga malillugu, Aqqaluk Lynge oqarpoq.
Aamma nunarput peqateqarluni angusaqarnerusinnaassasoraa.
- Nunarsuup inissisimanera qiviarutsigu, pissaanilissuit, silap pissusiata allanngornera allallu eqqarsaatigalugit, Kalaallit Nunaata inukitsunnguulluni periarfissai killilerneqariataarsinnaapput. Kisiannili naalagaaffimmik suleqateqarluarnikkut angusassat suli amerlanerusinnaapput, Aqqaluk Lynge oqarpoq.
Namminersulernissarli neriuutaajuartariaqartoq Aqqaluk Lynge isumaqarpoq.
- Uanga isumaga taannaavoq, inuiaat kalaallit namminersulissaqqaarput. Kisianni oqarsinnaanngilanga qaquguussanersoq.
Namminersulernissamulli suliaq kinguaariinnit tullernit suliarineqartariaqassaaq.
- Massakkut utoqqanngulerama oqarsinnaanngorpunga, inuusuttut suliassaat tassaanerupput inuiaqatigiit nukittorsassallugit. Alloriaqqinnissap tullianut piareersassallugit, Aqqaluk Lynge oqarpoq.
Aqqaluk Lyngep apersorneqarnera qulaani isiginnaarsinnaavat.