Inuusuttut kanaalissartik nuannaarutigaat

KNR-ip radiokkut aallakaatitsivik Voice Of Greenland pisiareqqammerpaa, radiokkut inuusuttunut aallakaatitsivissatut eqqarsaatigalugu. Inuusuttullu KNR-imiit apersukkatta imminnut tunngasunik sammisaqarfiusumik radioqanernissaa assut iluaraat.

Naak Voice Of Greenland nuna tamakkerlugu aallakaatitsisinnaanissaminut akuersissummik suli pissarsinngikkaluartoq, inuusuttunut immikkut saaffiginnittumik radioqalernissaa pisariaqartoq, nunatta avannaatungaanersuut apersukkavut tamarmik oqarput. 

Aamma atuaruk Malittarisassat akerleriittut KNR-ip inuusuttunut aallakaatitsivia eqqorpaat

Aqqalu Sigurjonsson Reimer Qasigiannguani efterskolertoq isumaqarpoq, ullutsinni inuusuttunut radioqarnissaa pisariaqartoq.  

- Inuusuttut eqqarsaatigissagaanni torrattorujuussooq aamma inuusuttut immikkut silarsuaqalaartariaqaramik kalaallit nunaanni. Uagut aamma inuusuttuusugut inuunerisarput ullutsinnilu qanorittuunersugut kalaaleqatitta aamma paasissagaluarpaat.

Kisimiinngilarli taamannak isumaqartoq, Piiannguaq Kruse Uummannami atuartoq isumaqarpoq, ullutsinni radiokanalimik immikkut inuusuttunut tunngasumik peqalernissaa pisariaqartoq. 

- Isumassarsiaq pittaanermut. Inuusuttuaqqat ajornartorsiuteqartaramik mikinerminiilli pinikut ilaannilu annissuiffissaqartaratik maanilu psykoloqarnani arlaannik annissuiffissaqarpallaarani, Piiannguaq Kruse taamatut oqarpoq. 

Siunnersuuteqartut

Suut aallakaatinneqartarnissaannut siunnersuutissanik inuusuttut ulikkaarput, aammalu nipilersuutinik inuusuttunut tulluarsakkanik tusarnaartarusupput.

- Soorlu inuusuttut ataasiakkaarlugit oqaluullugit, nukappiaqqat soqutigisaat odds-it pillugit kikkut unammissanersut, tamakku soqutiginartorujuusinnaapput aamma. Taavalu aqangulunnikkersaarutit soorlu misigisimasat illarnartut. Immaqa aamma inuusuttunut soqutiginartut atoqatigiinnermut tunngasut, Vivian Sandgreen, GU Aasianni atuartoq taamatut oqarpoq. 

Taanna aamma kissaatigaa, anguteqatiminoortartut arnaqatiminoortartullu  radiukkut eqqartorneqarnerulissasut, taamaasillutik inuusuttut ataqqinninnerulissammata.

Voice Of Greenland nuummiinnaq aallakaatitsisarsinnarluni qitiusumik oqartussanit piumaffigineqarluni ippassaq unnuap qeqqanut radiokkut aallakaatitsiunnaarpoq. Voice Of Greenland www.vog.gl-ikkut nuna tamakkerlugu maanna tusarnaarneqarsinnaavoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!