Siulittaasunngortoq: Kiffartuussinissamik isumaqatigiissutit partiimi ajornartorsiortitsipput

Knud Kristiansenip partiimi siulittaasuujunnaarlunilu ilaasortaajunnaarnerata kingorna politikeri KNR-imut taama oqarpoq.

- Aggustip qaammataani ataatsimeersuartoqarnissaata tungaanut siulittaasuunissara siunniunneqarpoq. Taamaammat siulittaasunngorlunga akisussaaffik tigusussanngorpara, Qulutannguaq Inuk Berthelsen marlunngornermi ullaap tungaani taama oqarpoq.

Qulutannguaq Inuk Berthelsen nuummiuuvoq 32-nillu ukioqarluni.

Partiimi ilungersunartorsiorfiusumi akisussaaffik taamaalilluni tigusussanngorpaa. Partiimi siulittaasoq siulittaasullu tullia piffissap sivikitsup iluani tunuarput, partii naalakkersuisooqatigiinnit oktobarimi peqataajunnaarsitaavoq qinersisartunillu tapersersorneqarnera aatsaat taama appasitsigaluni.

Ajornartorsiutit partiimut akornutaasut siulittaasunngortup nassuerutigaa.

- Siulersuisuunerni ilaasortallu akornanni ajornartorsiuteqarpoq. Kiffartuussinissamik isumaqatigiissutit partiip iluani annertuumik assortuussutaasimanerat partiimit tunuartoqarangaat utoqqatsissutigineqarnerpaasarpoq. Tamannalu ajoraluartumik Atassutip iluani ajornartorsiutinik pilersitsisimavoq, siulittaasunngortussaq taama oqarpoq.

Siulittaasup maanna tunuartup tunuarnissaa partiimi oqaluuserineqarsimanngitsoq Qulutannguaq Inuk Berthelsenip oqaatigaa, taamaammat partiip tamatumunnga pisortatigoortumik qanoq isumaqarnera oqaatigissallugu siusippallaarpoq. Namminerli Kristiansenip tunuarnera uggornartoqartippaa, Berthelsen naapertorlugu inuusuttunik pingaartitaqarsimammat.

Partiimili qaammatini kingullerni pisut ilungersunartut periarfissanik pitsaasunik aamma nassataqarnerarpai.

- Neriuppunga inuusuttut periarfissaq atorluassagaat kinguaariillu nutaat ingerlatitseqqillutik. Tamannalu aamma piareersimaffigaarput, Qulutannguaq Inuk Berthelsen taama oqarpoq.