Toqutsisup qanoq ukioqarnera tamanit arajutsineqartoq: Inuusuttuaraalluni toqutsisoq sakkukinnerusumik pillaatisinneqassasoq
Nutartigaq tallimanngorneq 27.10: Ilanngutassiami siullermi suliami illersuisup eqqartuussisulluunniit MP-p pisup nalaani 18-it inorlugit ukioqarnera maluginiarsimanngikkaat allassimavoq. Tamannali eqqunngilaq. KNR-ip kukkussut ajuusaarutigaa.
Unnerluussisussaatitaasut, nukappiaqqap illersuisuiata eqqartuussisullu eqqartuunneqartup arnamik toqutsinermini 17-inik ukioqarnera arajutsisimavaat. Paasissutissaq eqqartuussisoqartillugu ilisimassallugu pingaarutilik.
Unnerluussisussaatitaasut kukkunertik maanna iluarserusuppaat sakkukinnerusumillu pineqaatissinneqarnissaa Nunatta Eqqartuussisuuneqarfiani piumasaqaatigalugu.
Suliami pineqartoq tassaavoq angutip MP-p ullumikkut 20-t sinnerlugit ukiullip Tasiilami Amitsivartimmi juulimi 2013-imi toqutsinera. MP-p arnaq niaquatigut sermiminermik anaavaa, taamalisinnarlunilu sissap killinganut kalillugu, tassanilu arnap timaa toqungasoq niaqua ilanngullugu immamut morsutsissinnarlugu qimaannarpaa.
Kinali toqutsisuunersoq politiinit 2013-imi paasineqanngitsoorpoq. Aatsaallu ukiut arlallit qaangiummata takunnittut marluk politiinut saaffiginnipput kinalu toqutsisuusinnaanera oqaatigalugu. Tassa MP takunnittunit marlunnit toqutsisutut oqaatigineqarpoq.
MP ujajaasimasutut ikiaroornartulerisimasutullu politiinit Jyllandip avannaani illoqarfimmi Hjørringimi 2016-imi tigusarineqarami 2013-imi toqutsineq pillugu apersorneqarpoq.
Toqutsimasutut unnerluutigineqartoq
Paasissutissat takkunnittut politiinut saqqummiussaat angutip ilumoornerarpai. Kingornalu arnamik 2013-imi aasakkut sissamut qimaannakkaminik toqutsisimasutut unnerluutigineqarluni eqqartuunneqarpoq.
Angut pineqartoq ukiuni arfinilinni qaammatinilu arfineq-pingasuni pinerluuteqarsimasunut inisissiisarfimmiittussanngorlugu Eqqartuussisoqarfik Sermersuumi 2017-imi januaarip 23-ani eqqartuunneqarpoq ullumikkullu Tasiilami pineqaatissinneqarsimasunut inissiisarfimmiitinneqarluni. Taamatullu pineqaatissinneqarnera unnerluussisussaatitaasut piumasaqaataat malinneqassappat sisamanngormat allanngortinneqarsinnaavoq.
Pillaatissaq ukiunik arlalinnik sivikilliniaraat
Unnerluussisussaatitaasut Nunatta Eqqartuussisuuneqarfianut suliaq suliareqqitassanngortippaat, MP-p sakkukinnerusumik pineqaatissinneqarnissaa piumasaqaatigalugu. Eqqartuussisoqarfiup eqqartuussutaata kingornatigut suliareqqinneqarnerani MP-p 2013-imi toqutsinermini 17-inik ukioqarnera unnerluussisussaatitaasunit paasineqarpoq.
MP-p toqutsinermini 18-it inorlugit ukioqarnera unnerluussisussaatitaasut, MP-p illersuisuisuata eqqartuussisullu eqqartuussisoqarfimmi eqqartuussisoqaqqaarmat arajutsisimavaat.
Paasissutissarlu taanna qanoq eqqartuussisoqarnissaanut aalajangiisuusoq, unnerluussisussaatitaasoq Michael Bo Hansen, Nunatta Eqqartuussisuuneqarfiani suliamik sisamanngormat ingerlatsisussaq taama nassuiaavoq.
MP-p toqutsisimasutut pisuutinneqarluni unnerluutigineqarnera suliareqqitassanngortinneqanngilaq.
MP-p kiunera KNR-ip ilisimavaa.