Inuusuttuaqqat annertuumik tillinniarput
Qaqortumi politiit ullumi Eqalugaarsunnukassapput Pilersuisoq pisiniarfiani aserorteralunilu tillinniarneq misissoriartorlugu. Nunaqarfimmilu 100-ut missaannik inulimmi kikkut taamaasiorsimanersut pilertortumik paasineqarpoq.
- Inuusuttuaqqat marluk 14-nik 15-nillu ukiullit tillinniarsimapput. Qanoq pineqarnissaat pillugu oqaaseqarnissamut suli maanna siusippallaarujussuarpoq, Qaqortumi politiini vicepolitikommisær Bent Ole Kleist oqarpoq.
Inuusuttuaqqat taakku marluk annertuumik aserorteripput attaveqarnermut atortut ilanngullugit aserortersimallugit. Taamaammat Pilersuisoq ippassaq matoqqagallarpoq.
- Attaveqarnermut atortut suli iluarsineqanngillat. Taamaattoq aningaaserivikkut sullissineq nalunaaquttap akunnerini marlunni ullumi ammatinniarparput. Pisiniarfik taamalu orsussanik inuussutissanillu nioqquteqarneq nalunaaquttap akunnerini amerlanngikkaluani ullumi aamma ammassaaq, Pilersuisumi niuertarfeqarnermut pisortaq Frederik Olsen oqarpoq.
Tillinniarnerup aserorterinerullu qanoq naleqarsimanerat suli paasineqanngilaq. Sapaatip akunneratali naanerani politiit misissuinerisa tamanna takutissajunnarsivaat.
