VIDEO Inuusuttorpassuit suliffissaaleqinerat aarlerinarpoq
Inuit Ataqatigiit inuusuttaanniit Múte Bourup Egedep, inuusuttorpassuit suliffissaaleqinerat aarlerigalugu oqallissaarivoq.
- Inuusuttut siunissami pilersuisussaammata taama amerlatigisut suliffissaaleqinerat iliuuseqarfigineqartariaqarmat oqallissaarivugut, Múte Bourup Egede oqarpoq.
Aamma atuaruk Suliffissaaleqineq akiorniarlugu innersuussisarfissaq pilersinneqassaaq
Suliffissaaleqisoq ilungersunartorsiorpoq
Suliffissaaleqisuulluni inuttut ilungersunartoq Susanne Larsenip oqaatigaa.
- Ilaanni naalliunnartorujuusarpoq, nammineq ornigutinngikkaanni naalliunnartaqaaq, suliffeqarani susassaaleqinartaqaaq, Susanne Larsen oqarpoq.
Meeqqat atuarfii qiviarneqartariaqalerput
Inuusuttut Piareersarfimmi ilinnialertartut amerliartornerat pillugu, meeqqat atuarfiat qiviarneqartariaqalersoq Múte Bourup Egedep oqaatigaa.
- Meeqqat atuarfianiuna suut iluatsittarsimannginnatsigit taama amerlatigisut Piareersarfinnut inissanik tunniussisariaqalersimanerput pingaartumik oqallisigisariaqarparput, Inuit Ataqatigiinni ilaasortaq, Múte Bourup Egede Qanoruumut oqarpoq.