GE: Inuussutissarsiutinik ingerlataqartut atugarissaarneq qulakkiissavaat
Ataatsimeersuarnermi GE-mit aaqqissuunneqartumi Nunatsinni inuussutissarsiornerup iluani atugassarititaasut sammineqassapput, inuiaqatigiillu ineriartortinneqarnerinut namminersortut qanoq pingaaruteqartiginerat politikerinut paasissutissiissutiginiarneqassalluni.
- Ataatsimeersuarnerup inuussutissarsiornermut politikki pillugu oqalliffiunissaa pingaarnerpaavoq, Sulisitsisuni pisortaq Brian Buus Pedersen KNR-imut taama oqarpoq.
Inuussutissarsiutinik ingerlataqartut ineriartortitsisuussapput
Ataatsimeersuarneq Future Greenland sapaatit-akunnerata tulliani marlunngornermi pingasunngornermilu ingerlanneqassaaq, Nunatsinnilu inuussutissarsiuteqartut kattuffiat naapertorlugu inuussutissarsiutinik ingerlataqartut pitsaanerusunik atugassaqartinnissaat politikerinut paasissutississutiginiarneqassaaq.
- Inuussutissarsiorneq pitsaasumik atugassaqarfiunngippat, suliffeqarfiit namminersortut amerlanerunatik avammullu nioqquteqarneq annertunerulinngippat, taava inuiaqatigiit atugartuut isumaginissaannut aningaasatigut siuariartornermik pilersitsisinnaanngilagut.
Inuussutissarsiornermut atugassarititaasut pitsanngorsaavigineqarnissaasa saniatigut aamma nunanit allanit Nunatsinni aningaasalersuinissamut soqutiginnilersitsinissaq ataatsimeersuarnermi sammineqassaaq. Taamaammat Sulisitsisut naapertorlugit ataatsimeersuarnermut qulequtaritinneqartoq tassaavoq: Aningaasaatit, piginnaasat naammassisaqarsinnaassuserlu.
- Aningaasat nunatta avataaneersut atorlugit piginnaasalinnik nunatsinni piginnaasanik pigeriikkatsinnut tapertaasinnaasunik pissarsiniarsinnaavugut, Brian Buus Pedersen taama oqarpoq.
Nalaagaaffeqatigiinneersut amerlanerusut
Ataatsimeersuarnermut Nuummi kulturikkut illorsuarmi Katuami sapaatit-akunnerata tulliani pisussamut peqataaniarlutik nalunaarsimasut 387-iugallarput. Amerlanersaallu Nunatsinni Danmarkimilu najugaqaraluartut, Brian Buus Pedersenip erseqqissaatigaa Future Greenland aamma nunanit tamalaanit peqataaffigineqassasoq.
- Ataatsimeersuarnermi isummersueqataanissamut piukkunnaateqartunik pissarsiortuarpugut, taamaaliornikkut taakkuinnaalluta oqaloqatigiinnissarput pinngitsoortinniarlugu.
Ataatsimeersuarneq kingullermik ukiut marluk matuma siorna ingerlanneqarmat, Halibut Greenlandimi pisortap Niels Thomsenip oqalugiartussat Danmarkimeersut amerlavallaarnerarlugit isornartorsiuivoq nunanillu tamalaanit oqalugiartussanik amerlanerusunik ujartuilluni. Brian Buus Pedersenilli erseqqissaatigaa ukioq manna Canadamit, Islandimit Danmarkimiillu oqalugiartoqassasoq.
- Aamma Margrethe Vestagerip peqataaneratigut Bruxellesimit peqataaffigineqassaaq. Taamaammat isumaqarpunga ataatsimeersuarneq nunanit tamalaanit peqataaffigilluarneqassasoq, Sulitsisuni pisortaq, Brian Buus Pedersen, taama oqarpoq.