Inuussutissarsiutinik ineriartortitsineq pillugu 2016-imi isumasioqatigiissitsinissaq Inatsisartut ataatsimoorfigigaat

IA-p siulittaasuata Sara Olsvigip allagaanik, Inatsisartunilu partiit tamarmik tapersigaannik ataatsimoortumik oqaaseqateqarnikkut tamanna pivoq.

- Ukiuni aggersuni inuussutissarsiornikkut politikkikkut allatigullu inuiaqatigiittut ataatsimoorussaasunik siamasissunillu isumaqatigiissusiorfiusinnaasunik anguniakkanik periusissanillu tigussaasunik siunnerfilersuinissaq isumasioqatigiinnerup siunertarissavaa. Ataatsimoorussamik oqaseqaamminni Inatsisartut taama allapput.

Inuussutissarsiortut, aningaasaliisartut, nunaqarfinni aqutsisuni, kommunini Inatsisartunilu politikkikkut suliallit, sulisartut sulisitsisullu kattuffii, kattuffiit allat allallu suliamut attuumassuteqartut peqataanissaat Inatsisartuni partiit kissaatigaat.

Ataatsimoorussamik oqaaseqaat Naalakkersuisunut pituttuisuunngilaq

Sara Olsvigip Inatsisartuni partiinit tamanit taperserneqarnini nuannaarutigaa.

- Ullumikkut ataatsimut oqaaseqaateqarneq ajunngilluinnartumik oqariartuuteqarneruvoq siunissamilu suleqatigiilluarnissamut isumalluartitsisuulluni. Inuit Ataqatigiinnit partiit tamarmik tapersersuinerannut oqallinnermullu peqataalluarnerannut qujarusuppugut, Sara Olsvig allappoq.

Ataatsimoorussamilli oqaaseqaat Naalakkersuisunut pituttuisuunngilaq.