Inuup pissusaa immikkuullarissumik isumaqarpoq

-    Folketinngimut qinersinermi partiilersortoqarpallaarani pikkajuttarpoq, tassani inuit ataasiakkaat qinerneqartarput. Qinerneqarnissaminnut ilimanarnerusarput qineqqusaarluartut, soorlu TV-mi radiomilu qineqqusaarnerni.

Henrik Skydsbjerg naliliivoq, qineqqusaartut inuttut qinerneqarnissaat qinersinermi apeqqutaangaatiassasoq, tassani peqqutaanerarlugu maannamut qineqqusaarutissat qulequtaanik iluamik suli tusagaqannginnerput.

-    Maannamut suli qineqqusaarutinik iluamik tusanngilagut, soorunami kisiat qineqqusaartoqalerpat qineqqusaarutaasut paasissavagut  Henrik Skydsbjerg oqarpoq.  

Maannamut folketinngimut qineqqusaartut inuit 16-niugallarput.
Folketinngimullu Kalaallit Nunaanniit inuit marluk, taamaallaat ilaasortaalersussaapput. Kikkut ilaasortaalissanersut, septemberip ulluisa 15-niata kingorna aatsaat paasissavarput.
Henrik Skydsbjerg aperaarput, folketinngimut qinersinissaq sooq pingaaruteqarnersoq, maannami namminersorneq eqqunneqarnikuuvoq, akisussaaffiillu amerlasuut nunatsinni  aalajangiiffigineqartalernikuullutik.

-    Kalaallit Nunaanni politikkerinit suli akisussaaffigineqanngillat eqqartuusiveqarneq, sakkutooqarneq, sillimaniarneq aalisakkanillu misissuisarneq. Taamaammat kalaallit foketinngimi issiatitaqarnissaat, malunnaateqaqataanissaallu pisariaqaqaaq, Henrik Skydsbjerg oqarpoq.