POLAR NANOQ Inuttat kilisaammut utersinnaanngortut

Kilisaammi Polar Nanumi maanna Reykjavikip umiarsualivianiittumi inuttat kilisaammut utertinnaanngorput. Islandimi politiit kilisaammi ippassaq unnukkut unnuarlu misissueernerisa kingorna utersinnaanngorput.
Assi © : Tammy O./Flickr Creative Commons
januaarip 20-at 2017 07:45
Nutserisoq Simon Uldum -

Polar Seafoodimi kilisaatinut pisortaq Jørgen Fossheim KNR-imut taama ilisimatitsivoq.

Kilisaammi inuttat ilaasa islandimiup arnap 20-nik ukiullip periarfeerunneqarneranut attuumassuteqarsorineqarnerannut atatillugu Islandimi politiit kilisaat Polar Seafoodimit pigineqartoq pingasunngormalli misissuiffigilerpaat.

Inuttat marluk maannamuugallartoq sapaatit-akunnerini marlunni politiinit tigummigallarneqarput, qanorli unnerluutigineqarnersut politiit avammut nalunaarutigiumanngikkallarpaat.

Ikiaroornartumik hashimik annertuumik sisamanngormat ualikkut nassaartoqarnerata kingorna aamma kilisaammi inuttaq alla sisamanngormat ualikkut tigusarineqarpoq. Kilisaatinut pisortaq Jørgen Fossheim naapertorlugu hadhi 40 kiilu pineqarpoq. KNR-imut aamma oqaatigaa taassuma ataasinngorpat iperagaanissaa naatsorsuutigalugu.

Polar Nanoq pilersaarutit malillugit Islandimit ataasinngorpat tunup imartaanut aallassaaq.

Arnaq periarfeerunneqartoq politiinit suli ujaarineqarpoq.