Pisortaq: Inuttat aalisarsinnaanngoqqiliivipput
Inuttallumi ajoratik aalisariaqqissinnaalersut kilisaammik piginnittup Sigguk Trawlip, Polar Seafoodimit piginneqataaffigineqartup, pisortaa Frans Heilmann oqarpoq.
- Ippassaq psykologit oqaloqatiginnipput suleqatigullu, assut taanna qiimmaallaatigisimarpaluppaat, taavalu angalanissamut tullissaanut piareerpalullutik, Frans Heilmann taama oqarpoq.
AAMMA ATUARUK Polar Nanumi inuttat marluk politiinit tigusarineqarput
Pisortattaaq oqaatigaa erngerlutik suleqatitik ilaat Islandimut aallarsimasut, eqqartuussissuserisunillu, nutserisunik tarnillu pissussanik immikkut ilisimasalinnik pissarsisimallutik.
- Piffissaq sioqqunniaannaavissimavarput, iliuuseriniakkavullu aamma naapertuupput piffissap ingerlanerani. Uagut soorunami pisumi ilungersunartumi aqutsisuunngilagut, Islandimi soorunami pisortat aquppaat suna tamaat, taamaattumik killilerujussuuvoq qanoq iliuuseqarnissatsinnut aamma ilaatigut susoqarnissaa inuttat tungaatigut uagut soorunami naalagaaffiginnginnatsigu. politiit tamaat ingerlammassuk, kisianni tamaviat atorlugu politiit suleqatiginiarsimavagut, Frans Heilmann oqarpoq.
Inuttat killisiorneqarnerminni nutserisussaqartinneqartarsimannginneri, nunanut allanut tunngasunut naalakkersuisup Vittus Qujaukitsup ernumanartissimallugu KNR-imut ippassaq oqarpoq.
- Island aamma isorartulaakasiuvoq. Telefonnormut pissarsiarisussaaqqaarpagut taavalu sumiinneri, imminnut assartortariaqarput, tamakku tamarmik pisuullutik soorunami kinguaattoortoqartaropoq ajoraluartumik, kisianni takkukkaangamik erngerlutik aallartittarput. Imaanngilaq uagut paamaarukkatsigu, Sigguk Trawlimi pisortaq Frans Heilmann taama oqarpoq.
