Nunavik: Inuit nunartik pillugu sukataarnerat pillugu atuagaq nutaaq
Zebedee Nungak, naggueqatigiit Inuit sinnerlugit allaaserisaqartartoq, naggueqatigiillu Inuit suliniaqatigiiffianni Makivik Corporationimi siornatigut præsidentiusimasoq, atuakkioqqammerpoq.
Nungap atuakkiaata taaguutaa tassaavoq "Nunasiaataasimaneq paallugu: Quebecimi naggueqatigiit Inuit nunartik pillugu sukataarput", Montrealip rådhusiani persuarsiutigalugu saqqummersinneqarpoq, borgmesteri Denis Coderre ilaatigut peqataalluni.
Atuakkiap kikkunnit tamanit atuarneqarnissaa pingaaruteqartoq, Makivik Corporationip maanna præsidentiata Jobie Tukkiapiup saqqummersitsinermi ilaatigut oqaatigaa. Canadap oqaluttuarisaanerata naggueqatigiit Inuit tungaannit isigalugu Zebedeemit atuakkiarineqarnera pineqarpoq. Naggueqatigiimmi Inuit oqaluttuarisaanerat atuarfinni annerusumik ilaatinneqarneq ajormata.
Nunavimmiut Nunaviup pilersinneqarnissaanut ukiuni 40-ni kingullerni sukataaruteqarsimanerat "Nunasiaataasimaneq paallugu: Quebecimi naggueqatigiit Inuit nunartik pillugu sukataarput"-mi eqqartorneqarpoq. Minnerit annernut unammillernerannik taaguuteqartinneqarsinnaavoq, Nunavimmiulli tunniutiinnarumasimanngillat, nukittullutik suliniuteqarsimallutik, Jobie Tukkiapik oqarpoq.
Atuakkiaq tuluttut aallaqqaammut saqqummersinneqarpoq, Inuktitulli franskisullu kingorna saqqummersinneqarumaarluni.