GM Inuit eqqillillu pinnguaataat soqutigineqaleraluttuinnartut

- Tassa, timersuutip una Kalaallit Nunaanni soqutigineqaleraluttuinnarnera malugineqarsinnaavoq, takuneqarsinnaalerlunilu qanoq soqutigineqartiginersoq. Allaat 137-t peqataallutik, Alfred Lindenhann, N-48 Arctic Sportsimeersoq taama oqarpoq.

Pissartanngorniunnerni aamma peqataasut, Bent Jakobsen Bibi Mikaelsenilu, pissartanngorniunnerni timersuutini assigiinngitsuni angusarissaarput, Inuit Sportsimi Dene Gamesimilu timersuutini katillugit 16-iusut akornanni ilaanni angusarissaarlutik.

Nuummiu Bent Jakobsen, angutini maannamut angusarissaarnerpaavoq, angusarissaarninilu ima ilaatigut nassuiarlugu:

- Unammissutit amerlasuut teknikkigiffigigakkit. Trænernikuuvunga kisianni trænerluartarnittuut trænernikuunngikkaluarlunga kisiat teknikkiginnerma ingerlarluartikkunarpaanga, Bent Jakobsen, Nuummit unammiartoqataasoq taama oqarpoq.

Unammersuarnermilu arnani angusarissaarluarnerpaaq Bibi Mikaelsen Qaqortumeersuuvoq, angusarissaarluarniaraannilu sungiusarluartariaqarpoq, siunnersuutissaqarporlu:

- Sungiusarluartarneq, sungiusaasoq tusaallugu taavalu imminut piumaffigaluni, Qaqortormiu Bibi Mikaelsen, Arctic Sportsimi unammersuarnerni arnani angusarissaarnerpaaq taama oqarpoq.

Arctic Sportsimi nunatsinni pissartanngorniunnerit Ilulissani ataasinngornermi marsip ulluisa 13-ianni aallartipput marsillu ulluisa 18-ianni naammassissallutik.

Minik Rasmussen Isikkamik Ataatsimik Qummut Isimmeriarnermini 2 meter 75 cm qummut pissilluni tukersivoq, taamaalillunilu pissartanngorpoq.