Politikki

Inuit Ataqatigiit Naalakkersuisullu suli oqaaseqarusunngillat

Pisoqarfiup nalaanit ullaap tungaa tusarfiit tutsuginartut, imminnullu attuumassuteqanngitsut, KNR-imut oqarput naalakkersuisooqatigiit nalilersorneqarneqartut, nutaanillu naalakkersuisooqatigiinnik pilersitsisinnaanissamut periarfissat misissuataarneqarnerat oqaluttuaraarput.

Allattoq Bibi Nathansen, Thomas Munk Veirum

oktobarip 26-at 2016 17:36

Tamanna pineqarsorineqarpoq maanna naalakkersuisooqatigiit suleqatigiinnerat naammaginanngitsumik ingerlanneqarsorineqarmat, ilaatigut kiffartuussinissamut isumaqatigiissutit isornartorsiorneqarsimaqisut eqqaaneqarsinnaapput, aamma nuna tamakkerlugu pilersaarusiamut pilersaarusiamut nassuiaat piffissaq kingullerpaaq atorlugu ullormut oqaluuserisassanit peerneqarsimanera eqqaaneqarsinnaavoq.

Aamma atuaruk Siumup Inuit Ataqatigiit qaninniarfigai

Naalakkersuisut ualeq manna ataatsimiipput.

Naalakkersuisulli siulittaasuat, Kim Kielsen, naapertorlugu qinigaaffiup qiteqqunnerani naalakkersuisooqatigiit naliliisoqarpoq, Siumullu gruppia tamanna pillugu ataatsimeeqqammerpoq, ilaasortallu tamanna pillugu paasitinneqarlutik. Siulittaasuttaaq oqaatigaa naliliineq tallimanngornerup tungaanut ingerlanneqassammat.

IA-p siulittaasua Sara Olsvig oqaaseqarnissaminut piffissaqannginnerarpoq, ilaasortallu allat oqaaseqarusunnatik.

IA naapertorlugu aningaasanut inatsit pillugit IA-p siulersuisui maanna ataatsimiipput.

Tusarfiit ullaap tungaa oqaatigisaat uppernarsarsinnaanngilagut.