Inuit arlallit Londonimi aallaatillutik ikilerneqartut

NAL. 15.22 nutartigaq:

Londonimi ullumi aallaasersortoqarlunilu ikaartarfissuarmi biili inunnik arlalinnik apuivoq peqaarniisaarneqartoqarsinnaanera mattunneqanngilaq pisorli paasiniaqqissaarneqartoq DR-imit allaaserineqarpoq. 

Ikaartarfissuarmi biili apuivoq inatsisartoqarfiullu eqqaani aallaammik eqqartoqarluni. Pisullu imminnut attuumassuteqarnersut peqqarniisaarniarlunilu saassussinerunersoq maanna politiinit paasiniarneqarpoq.

Maannamut inuit 20-t ikilerneqarsimapput inuillu sisamat toqutaasimasut DR-imit allaaserineqarpoq. Toqutaasunit ilaavoq inatsisartoqarfiup eqqaani saassussisoq.

Inuit qulit ambulancenit ikiorserneqarsimalerput, inatsisartullu illorsuata eqqaani ikaartarfimmi inuit ikiorniarlugit passunneqarput. Ikilerneqartut ilaat pingasut ilinniartuupput takkualu ikaartarfissuarmiitillutik biilertumit aporneqarsimapput.

Politiit oqaaseqartartuat, B.J. Harrington tusagassiortunut oqaluttuarpoq, politiit arlallit ikilerneqarsimasut, qasserpiaalli ikilerneqarsimanersut suli oqaatigisinnaanagu. 

Tuluit premierministeriat Theresa May naalakkersuisut peqatigalugit ataatsimiittussanngortut, DR allaaserisaqarpoq. 

Tuluit Nunaanni inatsisartut ataatsimiittarfiata eqqaani ullumi eqqartoqariasaarpoq, pasineqartorlu politiimik kapisisimavoq kingornalu politiinit aallaaneqarsimalluni, DR allaaserisaqarpoq. 

Pisup nalaani politiit sakkulisartut inatsisartut ataatsimiittarfiata isaariaata tungaanut arpassimasut, takunnittup ilaata oqaluttuaraa. 

Tamatuma kingorna Inatsisartut illorsuat matuinneqarpoq.

Saassussinerit paasiniarneqartillugit Inatsisartoqarfimmi politikerit sulisullu aneqqusaajunnaaqqapput. Ann Mette Kjærby inatsisartoqarfimmi atorfilik aneqqusaanngitsut ilaat DR-mut malikkut allappoq, qulimiguulik 
qulaavaasoq tusaasinnaagitsik. Allaffimmiilli aneqqusaanatik.  

Peqqarniisaarniarluni saassussinertut politiinit isigineqarpoq tamannali suli paasiniarneqartoq DR-imit oqaluttuarineqarpoq.