Inuit aqqusinermi naapitat isumaqatigiipput: Sorsunneq ajorluinnarpoq, mattussinerli pisariaqarpa?
![](/sites/default/files/styles/image_934x467/public/article_images/img_91651.jpg?itok=nl56l5R3)
Kalaallit Nunarput Ruslandimut mattussiniarluni februaarip ulluisa 25-anni aalajangerpoq.
Naalakkersuisut siulittaasuat, Múte B. Egede (IA) tusagassiuutinut nalunaarummi allappoq.
Europami siuttut, aamma danskit ministeriunerat, Mette Frederiksen, Bruxellemut immikkut ittumik sisamanngornermi ataatsimiigiarneranni tamanna pivoq.
Ruslandimut "sakkortuumik mattussisoqassasoq" ataatsimeersuarnermi isumaqatigiissutigineqarpoq.
Ruslandimut aningaasaqarnikkut mattussineq pingaarnertut anguniarneqarpoq.
Mattussineq sorsunnerlu pillugu Nuummi innuttaasut isumaannik KNR tusarniaavoq.
Naapitatta ilagaat:
![](/sites/default/files/styles/image_934x467/public/piitakujooq_peter_kristiansen.jpg?itok=hF1EO9j5)
Assi: Jaaku Lyberth/KNR
Peter Piitakujooq Kristiansen
Ruslandip Ukrainemut saassussinerata kingunerisaanik . Kalaallit Nunarput Ruslandimut mattussivoq, tamanna qanoq isumaqarfigaajuk?
- Isumaqarpunga pisariaqanngikkaluartoq, pissutigalugu Ruslandimi inuinnannguakkului amerlanerit aamma sorsunnermut akerlileeriarmata. Taavalu nunatsinni inuussutissarsiutigalugu ingerlatalinnut ajoqutaaginnassammat..
Ruslandip Ukrainemut saassussinera illit qanoq isumaqarfigaajuk?
- Nuannarinngivippara, akuerisinnaanngilara.
Sooruna?
- Pissutigalugu, allaannginnami 1800-kkunni pissutsit atorlugit iliuuseqartut.
Annilaangavit?
- Maannga toqqaannartumik iliuseqartoqarnissaa ilimaginnginnakku annilaangaginngilara. Aamma ungasinngitsukkut qaangiunnissaa ilimagigakku, Peter Piitakujooq Kristiansen oqarpoq.
![](/sites/default/files/styles/image_934x467/public/article_images/anton_m._petersen.jpg?itok=DG3d3dan)
Assi: Bibi Nathansen/KNR
Anthon M. Petersen
Ruslandip Ukrainemut saassussinerata kingunerisaanik Kalaallit nunaata kinguneqartitsinera qanoq isumaqarfigaajuk?
- Kalaallit nunaata killilersuineranut uanga imatut tusagaqarpallaanngilanga. Kisianni taamaaliornera akuerineqarsinnaanngilluinnarutut isigivara.
Qanormi isumaqarpit taamaaliormat?
- Nunamininnguaq, tassami Ruslandimut naleqqiullugu taama mikitigisoq pisuussutai piinnarlugit taama iliornera akuerineqarsinnaanngilluinnartutut isigivara.
- Uku Facebookimi takusartakkagut filmeeqqat meeqqanut tunngasut, meeqqat naalliuttut nilliasut isigalugit susinnaanatalu annernarpoq, taamatut pisoqartoq akueriuminaalluniu.
- Uanga qamuuna nuanniilliuutigaara, tassami inoqatitsinnut taamatut iliuuseqartoqarnera, akueriuminaatsittorujussuusara.
Annilaangavit?
- Maannamut annilaangassuteqanngilanga. Annerusumik immaqa pisoqarpat immaqa annilaangalissaanga. Kisianni massakkut itinerusumik nunatsinnut attuivallaartutut isiginngilara.
![](/sites/default/files/styles/image_934x467/public/article_images/img_91591.jpg?itok=POp6zjQP)
Assi: Bibi Nathansen/KNR
Iddimanngiiu Bianco
Ruslandip Ukrainemut sorsunnera pillugu maanna Kalaallit Nunaat killiilersuilerpoq, tamanna qanoq isumaqarfigaajuk?
- Pisariaqarsinnaavoq, nunatut toqqissisimanartutut nunanut allanut sassarniaraanni immaqaluunniit nunat akornanni taamatut attaveqatigiinneq eqqarsaatigissagaanni pisariaqarsinnaasutut isigivara.
Kalaallit Nunaata killilersuinera iluaqutaassasoraajuk?
-Naluara toqqaannartumik iluaqutaasinnaanersoq, kisianni neriuppunga iluaqutaasoq.
Ruslandip Ukrainemut sorsunnera qanoq isumaqarfigaajuk?
- Ersinarpoq. Massakkut pisut ajorluinnartumik iliuuseqarnerupput.
Annilaangavit?
- Nunarput pineqalerpat nunarpullu akuliuppat annilaanganarsinnaavoq. Ukrainemi najugallit sinnerlugit annilaangavunga. Ukrainermiut annilaangakkuppakka. Tujorminarpoq, Iddimanngiiu Bianco oqarpoq.
![](/sites/default/files/styles/image_934x467/public/article_images/img_91651.jpg?itok=nl56l5R3)
Assi: Bibi Nathansen/KNR
Karl Zinglersen
Ruslandip Ukrainemut saassussinerata kingunerisaanik . Naalakkersuisut Ruslandimut killilersuilerput, tamanna qanoq isumaqarfigaajuk?
- Isumaqarpunga ajunngilluinnartoq
Sooruna?
- Isumaqarpunga nunarsuarmi qanoq inissisimanerup kikkullu illersornerlugit takutinnissaa pingaaruteqartoq. Kisianni assut nalorninarpoq, tamattami immitsinnut attuumassuteqarpugut. Aamma Ruslandimut.
Kalaallit iliuuseqarnerat iluaqutaassasoraajuk?
- Tamattami arlaatigut misiliisariaqarpugut. Nunat angisuut nunanit mikinerusunit iliuuseqarnerusariaqarput, kisianni tamatta ataatsimoortariaqarpugut.
Ruslandip Ukrainemut sorsunnera qanoq isumaqarfigaajuk?
- Soorunami ernumatsappunga, aamma Ukrainimi susoqassanersoq eqqarsaatigalugu. Ukrainermiunimi aamma nunatsinniittoqarpoq. Sanasorpassuit aamma Europami nunatsinnilu sulipput, taakkulu aamma arlaatigut nunatsinnut eqquissapput. Inuillu Ukrainemi ilaqutallit oqaluttuaat aamma tusareerpagut.
Qanoq ippit - annilaangavit?
- Naamik, annilaanganngilanga, kisianni neriuppunga nunatsinni siuttut nunat allat siuttuinut tapersersuissasut.
![](/sites/default/files/styles/image_934x467/public/dagmar_sandberg_joensen.jpg?itok=dT3E6oZ0)
Assi: Bibi Nathansen/KNR
Dagmar Sandberg Joensen
Ruslandip Ukrainemut saassussinerata kingunerisaanik . Naalakkersuisut Ruslandimut killilersuilerput, tamanna qanoq isumaqarfigaajuk?
- Pisunut assut malinnaavunga, soorunami. Savalimmiuninngaanneerpunga, soorlu Kalaallit Nunaat, nunatummi aningaasaqarnerup tungaatigut patajaatsumik inissisimanngiilagut, tassalu avammut tunisisarnitsigut eqqugaangaatsiartussanngorpugut. Inuillu alinartumik pineqarnerat eqqarsaatigalugu arlaatigut tapersersortariaqarpagut, isumaqarpunga. Tapersersuisariaqarpunga kisianni akunnattoorfiusoq oqartariaqarpunga.
Ruslandip Ukrainemut sorsunnera qanoq isumaqarfigaajuk?
- Ajorluinnarpoq. inuutillutilluta tamanna misigisussaanngilluinaraluarparput.
Annilaangavit?
-Naamik annilaanganngilanga. Toqqissisimaqaanga, nunarsuarmioqataanermut ilaagatta, pingaartitatsinnillu aalajangiusimalluta. Taamaammat annilaanganngilanga - ajugaassasut, eqqarsarpunga, Dagmar Sandberg Joensen oqarpoq.
Russit timmisartui nunarput qulaaqquteqqusaanngilaa
Danmarkip naalagaaffiup qulaani silaannaq russip timmisartuutaannut unnugu arfineq pingasunut matussavaa. Tamanna aamma nunatsinnut atuutissaaq, tassa russit timmisartuutai nunarput qulaallugu timmeqqusaajunnaassapput.
Angallannermut ministereqarfiup nittartakkaminut allappoq.
Tamanna Rusland Ukrainemut sakkulersulermat taamatut aalajangertoqarpoq.
Danmark europami nunat allat assigalugit iliuuseqarpoq, tassalu nunat silaannaanut russit timmisartuutai timmeqqusaajunnaarnissaanik iliuuseqarpoq.
- Nunarpassuit allat assigalugit Danmark russit saassussineranut assuarinnipput, soorunami aamma tamanna kinguneqassaaq. Taamaammallu russit timmisartui Danmarkip silaannaannut tikilluaqqusaajunnaarput.
- Inerteqquteqarneq Kalaallit Nunaanni Savalimmiunilu aamma unnuaqeqqaniit atuutilissaaq,
angallannermut ministeri, Trine Bramsen oqarpoq.
Inerteqquteqarneq, timmisartunut Ruslandimut nalunaarsorsimasunut, immaqaluunniit russit timmisartuutileqartigiiffiannut atuuppoq, timmisartut taakku Danmarkip silaannaatigooqqusaanngillat.
Russit timmisartui Danmarkip silaannatigut timmissagaluarpat, Illersornissaqarfiup russit timmisartuat aneqqullugu attavigissavaa.