Katersuussinnaanermut malittarisassat januaari ilanngullugu atuutissasut
Inuit silami amerlanerpaamik 250-it illullu iluani amerlanerpaamik 100-it kisimik katersuussinnaanerannut malittarisassat aappaagu januaari ilanngullugu atuutissaaq.
Coronami pillugu malittarisassat maanna atuuttut 2021-mi januaarip 31-ata tungaanut atortussanngortinneqartut, Naalakkersuisut siulittaasuata, Kim Kielsenip tusagassiortunik katersortitsinermi oqaatigaa.
Nalunaarutip maanna atuttup sivitsorneqarnissaa politikkikkut ataatsiut aalajangernerusoq qasseeriarluni erseqqissaatigaa.
Katersuunnissamut malittarisassani inuit amerlanerpaamik 250-it silami katersuussinnaasut illullu iluani 100-it killerissagaat allassimavoq. Aamma inini inissaqassutsip affaannaat kisimik atorneqaqqusaapput.
AAMMA ATUARUK Tamaat isigalugu: Coronavirus pillugu killiffik
Kommunit akornanni aaqqissuussisoqarsinnaannginnera suli atuuppoq, timersornernilu assigiinngitsuni Kalaallit Nunaanni tamanna pillugu pissartanngorniuttoqarsinnaanani.
Ernumanarluinnartoq
Naalakkersuisut malittarisassat taakku juulip ulluisa 21-anni ukioq naallugu atortussanngorlugit sivitsorpaat – taakkulu maanna 2021-mi januaari ilanngullugu aamma atortussanngortinneqarlutik sivitsorneqarput.
Naalli tunillatsissimasoq nunatsinni maanna ataasiinnaagaluartoq corona suli ilungersunarpoq. Nunanimi allarpassuarni tunillatsissimasoqaqisoq, nakorsaaneq, Henrik L. Hansen oqarpoq.
- Coronap nunarsuarmi ajornartorsiutigineqarnera annikinnerulinngilaq. Maani ingerlalluarpugut, kisianni nunarsuarmi allani ajorluinnarpoq, nakorsaaneq oqarpoq.
AAMMA ATUARUK Coronamik tunillatsissimasoq Nanortalimmiittoq ajunngilaq ersiuteqaranilu
- Nunatsinni sumiiffinni assigiinngitsorpassuarni tuniluuttoqaleratarsinnaanera suli ernumagilluinnarpara. Taamaammat nunatsinni kujataani, kitaani kangianilu tuniluuttoqaleratarsinnaammat aaqqissuussinerit nunatsinni tamarmit peqataaffigineqartut mianersuulluaqqissaarneqarnissaat naalakkersuisunut innersuussutigaara.
- Taamaattoqarpammi tunillaassuunnerup pakkersimaarniarnissaat ajornakusoortorujussuanngussaaq, annertuumillu kingunerlussalluni, nakorsaaneq, Henrik L. Hansen oqarpoq.
