NALUNAARUSIAQ Inuiattut ikinnerussuteqartutut inissisimalernissaq ministerip itigartippaa
“Kalaallinik assigiinngisitsineq akuersaarneqarsinnaananilu inatsisinik unioqqutitsineruvoq.”
Danskit isumaginninnermut nunamilu namminermi pissutsinut ministeriat Karen Ellemann KNR-imut mailikkut taama allagaqarpoq.
Nalunaarusiap "Kalaallit Danmarkimiittut naligiimmik pineqarnissaat" ullumi sisamanngornermi saqqummersinneqarnerata kingorna taama allappoq. Nalunaarusiami inerniliussat ilagaat kalaallit danskit tungaannit, ilaatigut danskit kommuniini sulisunit, isummanik pigiliutiinnakkanik assigiinngisitsinermillu misigitinneqartarnerat.
Taamaakkaluartoq kalaallit Danmarkimiittut, tyskit inuiattut ikinnerussuteqartutut inissisimasut assingalugit, Europarådip Nunami inuiaat ikinnerussuteqartut illersorneqarnissaat pillugu aalajangersagaa naapertorlugu, inuiattut ikinnerussuteqartutut inissisimalernissaat ministerip ilalernartinngilaa.
Inuttut Pisinnaatitaaffiit pillugit ilisimatusarfiup nalunaarusiamini tamanna inassutigigaluarpaa, kalaallit kulturiata immikkuullarissuunera erseqqissarniarlugu aammalu danskit akornanni ataqqineqarnissaat illersorneqarnissaallu pisariaqarnerarlugu.
“Kalaallit Danmarkimiittut inuiattut ikinnerussuteqartutut akuerineqarnissaat sulissutigissallugu naalakkersuisut pilersaarutiginngilaat. Kalaallit Danmarkimiittut danskisut innuttaassuseqarput, danskisullu innuttaassuseqartut allat assingalugit pisariaqartitsinerminni ikiorneqarnissaminnik tapersersorneqarnissaminnillu pisinnaatitaaffeqarlutik,” Karen Ellemann KNR-imut taama allappoq.
Inuiattut ikinnerussuteqartutut inissisimalernissamik siunnersuut ilalerneqartoq
Inuttut Pisinnaatitaaffiit pillugit ilisimatusarfiup nalunaarusiaa Peqatigiiffiup Naalagaaffeqatigiit ilassilluaraluarpaa, tassani siulittaasup Nauja Lyngep oqaatigalugu inuit Kalaallit Nunaanneersut Danmarkimi immikkut ittumik inissisimanissaat pisariaqartinneqartoq.
- Isumaqarpunga isumassarsiatsialaassasoq kalaallit Danmarkimi innuttaasut allat naligalugit inissisimalernissaasa tungaanut piffissami killilimmi immikkut ittumik inissisimalersinneqarsinnaanersut misissussallugu, siulittaasoq oqarpoq.
Aammattaaq Kalaallit peqatigiiffiisa kattuffiata Inuit siulittaasuata Bitha Metelmannip siornatigut oqaatigereerpaa kalaallit Danmarkimiittut immikkut ittumik inissisimalernissaat pisariaqartinneqartoq. Kalaallit Aalborgimi peqatigiiffianni Ikerasammi siulittaasoq, Juusi W. Petersen, aamma taamatut isumaqarluni siornatigut oqaatigaa.
Ministeri: Kommunit akisussaaffigaat
Kalaallit Danmarkimiittut danskitut innuttaassusillit assingalugit pineqartarnissaannut pingaartumik kommunit akisussaaffigigaat, Karen Ellemannip oqaatigaa.
“Taamaammat aamma soorunami naatsorsuutigaraa isornartorsiuisoqarnera kommunit pimoorullugu naalaassagaat. Kalaallit Danmarkimiittut amerlanerpaartaat ingerlalluarput, aamma isummat pigiliutiinnakkat kalaallillu isiginerlunneqarnerisa qaangerniarneqarnissaannut tamatta akisussaaffeqarpugut”, ministeri taama allappoq.
Kalaallit Illuutaat Danmarkimiittut nukittorsarneqartariaqartut Karen Ellemannip Dagbladet Politikenimut oqaatigaa. Tamannalu kalaallinik Danmarkimiittunik peqataalersitsiniarnermut suliniutinut aningaasaliissutinik Kalaallit Illuutaasa neriorsuuteqarfiginerinut atatillugu sulissutigineqalereerpoq.
