URANI Innuttaasut taasitinneqarnissaat pillugu Inuit Ataqatigiit isumaat erseqqinngilaq
Uranisiornissamik akuersisut akerliusullu Christiansborgimi Landstingssalimi ippassaq pingasunngornermi nalunaaquttap-akunnerini sisamani oqallipput.
Folketingimut ilaasortaq Inuit Ataqatigiinneersoq Aaja Chemnitz Larsen tusarniaanissamut aggersaasuuvoq, taassumalu partiiatalu uranisiornissaq pillugu apeqqut innuttaasut taasitinneqarnerisigut aalajangiiffigineqarnissaa kissaatiginerugaluarpaat.
Tamannalu tusagassiorfinnut nalunaarummi ippassaq nassiunneqartumi, tusarniaarnerullu siorna kingornalu, oqaatigeqqinneqarpoq.
- Innuttaasut isummernerisa ataqqineqarnissaanik tamanna isumaqarpoq. Taamaalilluta innuttaasut taasitinneqarnerisa inernera ataqqissavarput, Aaja Chemnitz Larsen tusarniaanerup kingorna KNR-imut taama oqarpoq.
Tamanna qanoq isumaqartippiarpiuk?
- Innuttaasut apeqqummut matumunnga qanoq isumaqarnersut tusarusupparput. Matumanimi apeqqut inuiaqatigiinni assigiinngitsorpassuartigut isumaqatigiinngissutaavoq. Politikkikkut isummerfiginiarparput, aammali innuttaasut isumaat tusarusupparput. Kujaamiummi eqqarsaatigissagaanni ilaqutariippassuit apeqqut manna avissaartuussutigivaallusooq.
Aamma atuaruk VIDEO Urani pillugu tusarniaaneq takoqqiguk
Siunnerfiliisumik taasititsinerussava?
Inatsisartunut kingullermik qinersisoqarmat, Inuit Ataqatigiit urani pillugu innuttaasunik taasititsinissamik kissaateqarnerat, tamatumunngalu peqatigitillugu taasititsinerup inernerata siunnerfiliiginnarnissaanik isumaqarnerat isorineqarpoq.
Partiillu kingorna nalunaarutigaa innuttaasunik taasititsisoqassappat "innuttaasut isummernerat ataqqiniarlugu".
Oqariarta taasititsinermi akuersisoqartoq. Taava IA isummani allanngortillugu oqassava: Aap, uranisiornissaq maanna isumaqataaffigilerparput?
- Innuttaasut isumaat ataqqissavarput. Tamanna oqaatigiinnarsinnaavara, Aaja Chemnitz Larsen taama akivoq.
Tamanna isumaqarpa innuttaasunik taasititsinissaq siunnerfiliiginnassasoq?
- Ilami, innuttaasut isummernerat ataqqissavarput.
Demokraatit: Innuttaasunik taasititsinissaq kingoqqutsereerpoq
Demokraatit innuttaasunik taasititsinissamut siornatigut isumaqataasimasut, Inuit Ataqatigiit innuttaasut taasitinneqarnissaannik ilungersuuteqaannarnerat isornartorsiorpaat.
Partii isumaqarpoq uranimut naaggaarluinnarnerup Inatsisartunit 2013-imi atorunnaarsinneqarnera ataqqineqartariaqartoq, naak Demokraatit taamani itigartitsillutik taaseqataagaluartut. Partiip Inatsisartuni gruppiani siulittaasoq, Michael Rosing, tusarniaanermi aamma peqataasoq taama oqarpoq.
- Innuttaasunik taasititsisoqassappat tamanna Inatsisartut aalajangiinissaat sioqqullugu pisussaavoq. Taamaammat uagut paasinninnerput malillugu aalajangiisoqareerpoq, taamaammallu allanngortinneratigut sangujoraartumik ingerlaqqittoqarnissaa peqataaffigiumanngilarput.
Siumumeersut Aleqa Hammondip Jens-Erik Kirkegaardillu ippassaq tusarniaasoqarnerani erseqqissaatigaat amerlanerussuteqartut aalajangernerat ataqqineqartussaasoq. Aamma uranimut naaggaarluinnarneq ataasinnarmik amerlanerussuteqarluni akuersissutigineqarsimagaluarpalluunniit. Michael Rosingilu tamatumunnga isumaqataavoq.
- Innuttaasunik taasititsinissaq naapertuutinngilaq. Inatsisartummi aalajangiinerisigut innuttaasut sinniisaat isummereersimasut oqartoqarsinnaavoq. Taamaammat innuttaasut isumaat tusarneqareerpoq.
