Innuttaasut pisortanut akiitsui ikiliartorput
Akiitsut taamaasillutik ukiut marluinnaat ingerlanerini 250 mio. koruunit missaannik ikilisimapput, AG taama allappoq.
Innuttaasut pisortanut akiitsui ukiorpassuarni amerliartuinnarsimagaluarput.
Allaammi ima ingasassimatigaaq, aningaasaqarnermut naalakkersuisuusimap Maliina Abelsenip IA-meersup akiitsut ullut tamaasa, ukioq kaajallallugu, 200.000 koruuninik amerliartorneri takusinnaasimallugit.
- Akiligassallit akiligassaq innuttaaqatiminnut ingerlateqqiinnartarpaat. Tamanna akueriinnarsinnaanngilarput, Maliina Abelsen taamani oqarpoq.
Maliinalli oqaaqqissaarinera pissutiginagu akiliisitsiniarnermili periaatsit nutaat atulernerisigut akiitsut ikiliartulersimapput.
Akileraartarnermut aqutsisoqarfimmi pisortap Kim Neumann Nielsen, tamanna pissutissaqarluartumik iluarisimaarpaa:
Pitsaanerusumut ineriartortoqarnera ilaatigut akiligassat ingerlaannaq ilanngullugit naatsorsuisalersimanitsinnik tamatumalu eqqumaffiginerulerneranik peqquteqarpoq, AG-mut nassuiaavoq.
Peqatigisaanillu aamma innuttaasut amerlasuut kontuminni aningaasanik uninngasuuteqartillutik akiligassanik akiliinermut kiffartuussivikkut PBS-ikkut ingerlaannartumik akiliisalersimanerat iluaqutaasimavoq.
Nunatsinni kommunit inuttunersaani, Kommuneqarfik Sermersuumi, akiligassalinnut periaatsinik nutaanik aamma eqqussisoqarsimavoq.
- Innuttaasut oqarasuaatikkut toqqaannartumik saaffigisalissavagut oqaloqatiginissaannullu aggersartassallutigit, kommunimi aningaasaqarnermut pisortaq Mette Kessel AG-mut taama oqarpoq.