Imigassamik atornerluisoqarnera innuttaasut qatsukkaat
Sisimiuni, Sarfannguani Itillermilu innuttaasut imigassaq pillugu inatsisip sukateriffineqarnissaa taperserpaat. Naalakkersuisoq Agathe Fontain, Sisimiuni, Sarfannguani Itillermilu innuttaasunik ataatsimiititseqqammersoq taama isumaqarpoq.
Namminersorlutik Oqartussat tusagassiorfinnut nalunaarutaat naapertorlugu, innuttaasut ataatsimoortumik oqariartuutaat pingaarnerit marluupput. Siulleq tassaavoq innuttaasut ataatsimiititsinermi peqataasut inuiaqatigiinni imigassamik atornerluineq annertooq qatsullugu imigassaq pillugu inatsisip sukateriffigineqarnissaanik tapersiinerat.
Innuttaasunit aamma oqaatigineqarpoq niuertarfiit imerniartarfiillu atornerluinermut tapersiinatik pitsaaliuinermi iliuuseqaqataasariaqartut.
Agathe Fontain Maniitsumi innuttaasunik ippassaq ataatsimiititsivoq, Nuummullu ullumikkut aallassaaq aqqutaanilu nunaqarfiit Napasoq aamma Atammik aqqusaassavai.