Innuttaasut: Aalakoornartunik pisisinnaaneq sivitsorli
2012-imili tassa ukiut tallimat matuma siorna imigassat ammasarfiisa sivitsorneqarnissaat inatsisartuni akuersissutigineqareeraluartoq, pissutsit assigiinngitsut pissutaallutik suli ulloq manna tikillugu tamanna atuutsineqalinngilaq. Akissarsiffinni, soorlu ullumikkut imigassat arfinernut matunnginnerini imigassarsiniat imigassaarniarfinnilu sulisut ulapputtaqimmata pisisartut pisiniarfinnilu sulisut ammasarfiit sivitsorneqarnissaat utaqqikatalluinnarput.
Tallimanngornermi Naalakkersuisut innersuussutigaat Imigassanik aalakoornartortalinnik nioqquteqarnermi ammasarfiit sivitsorneqarnissaanut siunnersuut ukiakkut ataatsimiinnermi 2017-imi saqqummiunneqassasoq, taamaalilluni imigassat pillugit inatsimmut maannamut atuuttumut tamarmiusumut ilanngullugu suliarineqassammat.
Soorluli ammasarfiit piaartumik sivitsorneqarnissaat innuttaasunit kissaatigineqartoq.
Imigassat aalakoornartutallik pisiniarfinni ammasarfiisa sivitsorneqarnissaat pillugu KNR-i Nuummi innuttaasut apersulaarpai, ataanilu akissutaat atuarneqarsinnaapput.
- Ajorinngilluinnarpara. Isumaqarpungali ulloq unnuarlu ammasarnissaat tulluarnerusoq. Taamaasillutik inuit pisariaqanngitsumik nangikkiartarunnaassapput. Aamma naammatsittalissagaluarput. Aamma imerniartarfinni immiaaqqat akisuupilussuupput, taava namminneq pisisalerunik eqiagisalissagaluarpaat taamarsuaq pisisarnissartik, Lilian Heilmann oqarpoq.
- Isuma taanna ajunngilluinnarpoq. Tassami sivisunerusumik ammasalerpata ullullu ingerlanerani pisiarineqarsinnaallutik taava takorloorsinnaavara imigassartornerup ajornartorsiutaanera appaallassinnaasoq. Aammami ullutsinni imerniartarfinni immiaaqqat akisunerujussuisa kingunerisarpaa meeqqat angerlarsimaffimminni nerisassaqarpiaratik inuusarneri, Apollo Jerimiassen oqarpoq.
- Arfininngornikkut sivitsorneqarsinnaanera ajoriffissaqartinngilara. Arfininngornikkut ataatsimut matusarneri pisiniarfiup iluani ulapputsitsisorujussuusarpoq. Immaqa arfernut tungaanut ammasarunik ajunngilaq. Aamma ilaqutariit meerartallik eqqissillutik pisiniarnissaminnut periarfissaqartariaqarput. Taamaalilluta meeqqat illersorsinnaavagut, Storm Ludvigsen oqarpoq.
