VIDEO Innarluutillip ikiorserneqarnissaa kinguartinneqaqattaartoq

Elisa Boassen naliginnaasumik sunut tamanut angalaarsinnaanngilaq. Innarluuteqaramilu aqqusinikkut angallassissutituani scooterit nutaanngilillutik aseroqattaarmata Elisa aporfissarpassuaqartarpoq.
oktobarip 17-at 2014 18:32

Elisa Boassen, 34-nik ukiulik, Sisimiuninngaanneersuuvoq Nuummilu Niuernermik Ilinniarfimmi ilinniartuuvoq.

- Susinnaanngilanga, taxanngikkuma anisinnaanngilanga. Elisa Boassen KNR-imut oqarpoq.

Elisa Boassenip naliginnaasumik pinngitsoorsinnaanngisai tassaapput scooterit, taakkoqaranimi Elisa nikissinnaasanngilaq.  Iluarsaannerinnaanilu utaqqerujussuaqqaartariaqartarpoq.

 

Elisa Boassen 1996-imi innarluuteqalertoq Qeqqata Kommunianut kinguneqanngitsumik attaveqartaraluarpoq.

Naak Elisa Boassen Nuummi ilinniartuugaluarluni Sisimiuni angerlarsimaffeqartuummat Qeqqata Kommuniata akisussaaffeqarfianiippoq, kommunimullu saaffiginninniartarneq aporfissaqartaannarpoq.

 

Suliaq pillugu misissuisoqartussanngorpoq

- Kissaatigissavara piaarnerpaamik Ilaqutariinnermut ataatsimiititaliami suliaq tiguneqassasoq, piaarnerpaamillu akineqassasoq. Agathe Fontain, Qeqqata Kommuniani kommunalbestyrelsemut ilaasortaq, KNR-imut oqarpoq.

Elisami suli Qeqqata Kommunianiit akissutissamik utaqqiuarsinnarpoq.

Scooterimmi pillugit Qeqqata Kommunianut februaarimili ukioq manna oqaloqatiginnikkaluarpoq, neriorsorneqarporlu scooterit pillugit marsimi tusagaqassasoq.

Qeqqata Kommunianili suliamik kinguartitsisaqattaalerpoq, maannalu kiisa oktobarinngorpoq suli akissutissarsinngitsoq.

Innarluuteqartumullu taamatut atugaqartitsineq akuerineqarsinnaanngilluinnartoq politikeri isumaqarpoq.