Innarluutilimmik meeraqarneq imaannaanngitsoq

Peroriartornermik misinnaatilimmik innaarluutilimmut, tassa autismemik innarluutilimmut angajoqqaajulluni unamminartorujussuuvoq. Ineriartornerminik innarluutilimmut Infantil autismemik taaneqartartumut nukappiaqqamut 13-nik ukiulimmut anaanaasoq taama oqaluttuarpoq.
Allattoq Nauja Møller
apriilip 23-at 2015 16:22

Nukappiaraq innarluuteqartoq paasineqarmalli ukiut siulliit amerlasuut piffinni arlalinni tapersersortinik ilinniarsimasumik isumaginnittullu sullissisut taarserarnerujussuat ajornartorsiutaasarsimapput.

Nukappiaqqap innarluutaa pingasunik ukioqalereersoq suussusersineqarpoq, tamannalu ilaqutariit ulluinnaanut allannguisimaqaaq:

- Pikkunarnikooqaaq, inissinniarnissaanut misigissutsikkullu nammineq akuerinissaa aqqutaa takinikooqaaq. Ullorput imatut ingerlasarnikuuvoq innarfiit makittarfiit, taakku assigiiaarnikuupput, taakkulu iluaqutiginikooqaat, Sidse Høy, Sander Høyimut infantil autismemik innarluutilimmut anaanaasoq taama oqarpoq.

Karsten aamma Sidse Høy nukappiaqqanut sisamanut angajoqqaajupput, Sanderilu angajullersaalluni.

Inarluutillik kisitsisaatigineqanngitsut

Autisme spektrum forstyrrelse ASF tassaavoq peroriartornermi misinnaatilimmik innarluuteqarneq. Isumaqarpoq qaratsap ineriartornera malunnaatilimmik arriinnerulluni naliginnaasumik ingerlanngitsoq. Taassumalu ataaniippoq, Infantil autisme.

Peroriartornermi misinnaatilimmik innarluuteqartut 174-it kommuninit nalunaarsorneqarsimapput, kisiannili Nunatsinni meeqqat inersimasullu qassit ineriartornermik amigaatilittut autismertut eqqoqqissaartumik kisitsisaatigineqanngillat.

- Ajoraluartumik autismertut qassiuneri immikkut kisinneqarneq ajorput, Innarluutillit pillugit ilisimatusarfimmi siunnersuisarfimmilu IPIS-mi siunnersorti Jane Justsen KNR-mut ilisimatitsivoq.

Sullinneqarneq pitsaanngitsoq

Aallaqqaammut nukappiaqqamut angajoqqaajusut ernertik peroriartornermini innarluuteqarnera akueriniarsarisimavaat. Taassuma saniatigut unammillernartoq alla aqqusaarsimavaat:

- Sagsbehandlerit (isumaginnittutut sullissisut) paarlakaannikuunerujussui ajornartorsiutiginikooqaarput. Taavalu aalajangersimasumik tapersersorteqarnissaa aamma ajornakusoornikuuvoq. Børnehavemi paarlakaannikuupput, Sidse Høy oqarpoq.

Angajoqqaavisa qutsatigeqisaanik ullumikkut piffissami sivitsortumi aalaakkaasumik nukappiaraq tapersersorteqarpoq.

Ukiut qulingiluat siulliit Sander Høy angajoqqaamini najugaqarpoq.

Atukkat oqilisut

2011-milu peroriartornermi innarluutilinnut tulluarsakkamut ulloq unnuarlu angerlarsimaffimmut Uulinermut Sander Høy inissarsivoq. Ulluinnarni taakani najugaqartarpoq sapaatillu akunnerisa naaneranni ilaquttaminut angerlartarluni.
Ullumikkullu angajoqqaavisa ernertik suliaminnut ilisimasalinnut paaqqutarineqarnera toqqissisimanareqaat:

- Uulinermi sulisut tamarmik pikkoreqigamik, nalunngilarput paarineqarluartoq. Aamma taakunga pigami siuariaatinik ulikkaarpoq, ulluinnarni uagut piffissaqarfiginngisagut, soorlu sungiusagassai, Sidse Høy oqarpoq.

Tusagassiortoq atuakkiortorlu Jeanette Rothenborg maajimi peroriartornermi misinnaatilimmik innarluutilinnut angajoqqaanut sullissisunulli oqalugiariartorluni suleqatigiisitsinermillu sammisaqartitsiartussaaq. Taanna nammineerluni infantil autismertumut anaanaavoq, innarluullu pillugu atuakkiornikuulluni.