Innaq nunamik sisoorfiusinnaasoq Vædderenimit nakkutigineqartussaasoq
Niaqornani innuttaasut qulimiguulimmik umiarsuarmut Vædderenimut qimagutitinneqareerput. Væderen Uummannamukarpoq, umiarsuarlu alla Ejnar Mikkelsen Aasiannukarluni.
AAMMA ATUARUK Illoqarfinnut marlunnut qimagutitinneqartut
Umiarsuaq Vædderen Uummannamukaassereeruni Nuugaatsiap tungaanukaqqissaaq. Innap nunamik sisoorfiusinnaasutut nalilerneqartup aqagu ullaakkut nakkutigineqarnissaanut Væderenip atorneqarnissaa pilersaarutaavoq. Nunamik sisoortoqarsinnaanera suli aarleqqutigineqarpoq.
Qimagutititsisoqaqqissanngitsoq
Najugaqarfinni Ikerasanni, Saattuni, Ukkusissani Qaarsunnilu innuttaasut qimagutitinneqassanngitsut politiit sillimaniarnermut nalileereerlutik aalajangerpaat.
Najugaqarfinnili taakkunani innuttaasut imaq ulikkiartornersoq suli nakkutigissagaat, politiit nalunaarutigaat.
Nunallu sisoorsinnaanera pillugu naliliinerup allanngorsimannginnera erseqqissaatigaat. Tassalu nuna sisoorsinnaasoq suli aarleqqutigineqarpoq.
