Innaallagiaq imerlu akitsulersut
Qullinik ikitsineq uffarnerlu akisunerulilerput. Nukissiorfiimmi akinik qaffaavoq.
Nukissiorfiit tusagassiuutinut nalunaarummi paasissutissiivoq.
Nukissiorfiit pilersuinerminnik patajaannerulersiniarluni ukiunut tulliuttunut qulinut pilersuinermut atortunut 2,5 milliardinik aningaasaliisussaanerat pissutaavoq.
Taamaammat Nukissiorfiit akinik qaffaanissaat Naalakkersuisunit akuerineqarpoq. Nukissiorfinnimi akinik qaffaanerit Naalakkersuisunit akuerineqartartussaapput.
Innaallagiap akia kilowattimut 10 ørenik akisunerulissaaq. Imerlu kubikmeterimut 1,20 koruunimik akisunerulissalluni.
Nukissiorfiit oqarnerat naapertorlugu ilaqutariit sisamanik amerlassusillit innaallagiamut imermullu qaammammut 44 koruunimik akiliinerusalernissartik naatsorsuutigisinnaavaat.
Akit nutaat 2023-mi februaarip aallaqqaataani atuutilissapput.
Millionilikkaanik amigartooruteqarneq aningaasaliinerlu
Nukissiorfiit imeqarfimmut, pilersuinermilu atortunik iluarsaassinissaminnut kiisalu nukissiornermut atortunut allanut ukiuni tulliuttuni amerlasuuni aningaasaliingaatsiarnissartik akinik qaffaanermut pissutaasoq nassuiaatigaat.
AAMMA ATUARUK Nukissiorfiit nutaamik pisortanitsitsipput
Tamatuma saniatigut Nukissiorfiit ukiuni kingullerni marlunni millionilinnik amigartooruteqarsimavoq.
- Akigitinneqartuni aningaasartuutiviit takuneqarsinnaanngippata, taava aarlerinaateqarpoq maannakkut pisisartut siunissami kinguaariinnut pisisartunut akiligassarpassuarnik pilersitsisut pilersuinermut, inuiaqatigiinnut aamma silap pissusaanut tuttussanik. Taamaattumik isumatusaarneruvoq akigitinneqartut allanngortissallugit, Nukissiorfiit aningaasaqarnermut pisortaa, Pierre Vassard tusagassiuutinut nalunaarummi oqarpoq.
Danmarkimi aningaasat naleerukkiartornerat aatsaat taama qaffasitsigisoq
Nunarput innaallagiamik atuinermut akit qaffakkiartorfigisaani kisimiinngilaq.
Europami nalinginnaasumik nukissiuutissaasuasoqarpoq. Innaallagiap gassillu akitsornerisa aningaasat naleerutsikkiartorpaat. Allaat Danmarkimi aningaasat naleerukkiartornerat 1982-imiilli aatsaat taama qaffasitsigaluni.
Septembarimi akit 2021-mi piffissami tassani akinit 10 procentimik qaffasinnerupput.
Danmarks Statistikimi Atuisartunik aamma iluanaaruteqartinnagu akinik nalileeriaaseq taama takussutissiivoq.
Europap sinnerani akit Ukrainemi sorsuttoqarnerata kingunerisaanik aamma qaffangaatsiarput.
