Inissiisarfiunatik parnaarussiviupput
Nunatsinni parnaarussiveqannginnera, pineqaatissinneqarsimasullu ikiorserniarneqartartuusoralugit ukiut 50-it sinnerlugit maani nunatsinni avataanilu isumaqartarsimagaluarpugut, Kalaallillu Nunaani pinerluttaalititsinermut inatsisit nunarsuarmi pitsaanerpaajuneri taakkartorneqartuartarsimalluni.
Tamakkuli tamarmik salluupput, Annemette Nyborg Lauritsen taama isumaqarpoq.
Arnap taassuma suliaminut atatillugu Nuummi Ilulissanilu ulluni 94-ini pineqaatissinneqarsimasut isertitsiviiniissimavoq, pineqaatissinneqarsimasullu 35-it apersoreerlugit pineqaatissinneqarsimasut isertitsivii parnaarussivittut taaneqassagunik tulluarsorilersimallugu.
2010-mi Nuummi pineqaatissinneqarsimasunut inissiivimmut isertinneqartut pingajoraarterutaat kisimiitsinneqarluinnarlutik parnaarussaaqqaarsimapput, taamatullu misigisaqarsimasut tarnimikkut nakkarsaatigisimaqaat. Pineqaatissinneqarsimasut pingajorarterutaannaat inissinneqarnermi nalaani aneersinnaatitaasimapput, tallimaraarterutaannaallu inissiisarfiup avataani suliffeqartinneqarsimallutik. Tassa innuttaasunut akulerutsitsiniaaneq iluamik takussaanngilaq, Annemette Nyborg Lauritsen taama inerniliivoq, innuttaasunummi akulerutsitsiniaaneq atorlugu pineqaatissinneqarsimasoq inuiaqatigiinnut atassuteqarnissaa Nunatta pinerlittaalititsinermut inatsisaani siunertarineqaraluarpoq.
Tamatuma saniatigut pineqaatissinneqarsimasut akunnerminni pissaaneqarniuttoqartaqaaq, tassalu oqaatilliisimasut kinguaassiutitigullu atornerluisimasut unatarneqariaannaajuarsimallutik. Isertitsiviit tamarmik iluini hashimik tuniniaaneq aaqqissuussaasumik ingerlanneqarpoq, oqaloqatigineqartullu pingajorarterutaat imminut toqunnissaminnik eqqarsaatersortarput, sualummillu Nuummi isertitsivimmi sulisut pineqaatissinneqarsimasunut pissusiluttarmata akerarineqaqaat.
Tassa nunatsinni pineqaatissinneqarsimasunut isertitsivimmiittunut atugassarititaasut parnaarussivinniit ajornerupput, ilisimatusartoq taama isumaqarpoq. Parnaarussivinnimi avataanut attaveqanngivilluni inuunissamut sakkussaqarput, "ammasumillu" parnaarussiviit soqaratik.
Annemette Nyborg Lauritsenillu inerniliinera malillugu Nunatsinni pineqaatissinneqarsimasunut inissiisarfiit inunnut inuiaqatigiinnit ajattugaasunut inissiisarfittut atorneqarput, pineqaatissinneqarnerullu nalaani ajattukkat inuunerisa ajornerulernerinik kinguneqaannartarluni.
Annemette Nyborg Lauritsenip Issittumi piorsarsimassutsikkut- oqaatsitigut- inuiaqatigiilerinermilu Ph.d.-nngorniutaa "Pineqaatissinneqarsimasunut inissiisarfiit - Kalallit Nunaata parnaarussivii"-nik qulequtalik ippassaq Ilisimatusarfimmi illersoramiuk iluatsippaa.
Annemette Nyborg Lauritsenip Ph.D-nngorniutaa "Anstalten - frihedsberøvelse i Grønland" Ilisimatusarfiup nittartagaani www.uni.gl -imi aaneqarsinnaavoq atuarneqarlunilu.
