Inissianik tuniniaagaluarneq kingunipiluppoq
Aningaasanut inatsit ukioq mannamut atuuttoq Inatsisartuni siorna ukiakkut akuersissutigineqarmat, naalakkersuisoqatigiit isumalluarpallaarsimapput. Illut Namminersorlutik Oqartussanit pigineqartut namminersortunut tunineqarnerisigut 30 millionit koruunit isertitsissutaanissaat naatsorsuutigineqaraluarpoq, inissialli marluinnaat tunineqarsinnaasimallutik.
Aamma atuaruk Nuummi inissianik tunisinissaq Vittus Qujaukitsup aalajangiusimavaa
Aningaasat taamaallaat 800.000 koruunit Namminersorlutik Oqartussat illuutiminnik tunisaqarnermikkut iluanaarutigivaat. Aningaasaqarnermut Naalakkersuisuugallartup Vittus Qujaukitsup ippassaani saqqummiussaani tamanna atuarneqarsinnaavoq. Ajornartorsiullu tassaavoq Nunatta karsiata ukioq mannamut aningaasanut inatsimmi 30 millionit koruuninik isertitsinissaa missingersuutigineqarsimammat.
Tuniniaanerigaluaq kingunipiluppoq
Allatut oqaatigalugu: Illuutinik tunisaqarnikkut aningaasat isertinneqarnissaat, Namminersorlutik Oqartussat isumalluutigisimavaat, Aningaasaqarnermullu Naalakkersuisoqarfik nassuiaasariaqassagunarluni. Aningaasat taakku 30 millionit koruunit, Namminersorlutik Oqartussat 100 millionilikkaanik amigartooruteqarnerannut pissutaaqataapput.
Illuutinik tuniniaanerit qanoq ingerlasimanersut, Aningaasaqarnermut Naalakkersuisuugallartup saqqummiussaani atorfilittat qupperneq 4-mi allaaseraat:
- Septembarip naanerani kontomi pingaarnermi 0,8 millionit koruuniinnarnik isertitaqarsimavoq, Aningaasaqarnermut Naalakkersuisoqarfik ilaatigut allappoq.
Inissiat marluinnaat ukiup ataatsip ingerlanerani tunineqarsimapput, allallu marluk qanittukkut immaqa tunineqarsinnaassallutik. Inissianik attartortut, inissiamik piserusussinnaasut pisinissartik kingusinnerusukkut tunuartiinnartaraat paasinarsivoq.
