Inisseeqqinnissamut tapiissuteqarneq qujamasuutigineqartoq

- Qujarutigaara taamatut aningaasaleeqqittoqarsimammat, Illorsuarneersoq Erik Møller taama oqarpoq.

Aamma Nuugaatsiami najugaqartut qimagutitinneqarput. Karl Peter Møllerilu taakkununnga ilaavoq, taassumalu oqartussat immikkoortitsinerat aamma qujamasuutigaa.

- Qujanarpoq assut taakkua, taamatut ikiorserneqassagutta, Karl Peter Møller oqarpoq.

Nutaarsiassarli pisumut alianartumit aallaaveqarmat, angutit taakku marluk nuannaarsinnaanerat killeqarpoq.

Ajunaarnersuarmi tarnikkut suli malunnartoq, Karl Peter Møller oqarpoq. Taanna Nuugaatsiami inunngorpoq, tassanilu ukiut 40-t sinnerlugit najugaqarluni. Taamaammat nunaqarfimmut suli angerlarsertarpoq.

- Siunissaq takorlooruminarnerussaaq, nunaqarfipput piorsaqqinneqarsinnaassappat.

Qaqqanilli suli nakkaasoqarsinnaammat, inuit Nuugaatsiamut Illorsuarnullu uteqqinnginnissaat Qaasuitsup Kommuniata sakkortuumik inassutigaa.

AAMMA ATUARUK Najugaqartut uteqqinnginnissaat sakkortuumik inassutigineqarpoq

- Tassami taamannak qimagutsinneqarnissarput allatut ajornarsimappat, assut artornarpoq, Karl Peter Møller oqarpoq.

Illoqarfimmi inuunerup sungiunnissaa unammillernarsimasoq Erik Møllerip oqaluttuaraa, Illorsuarnilu inuuneq qimattariaqarsimagaat eqqaatitsissutigalugu.

Illorsuilli najornagit inuunissaq takorlooruminarnerulersimagaluartoq, najugarisimasaq suli maqaasigaa.

- Nunaqarfinnguatsinnut eqqissisimanartumut qaqugumorsuarluunniit uterusuttuarpugut, Illorsuarmeersoq Erik Møller oqarpoq.

AAMMA ATUARUK Naalakkersuisut innuttaasunik inisseeqqinnissamut 70 millionit aningaasaliissutigigaat

Inisseeqqinnissamut 70 millionit koruuninik immikkoortitsinerup saniatigut innuttaasut illunik sanaqataaffiusunik namminerlu illulianik, suli Namminersorlutik Oqartussanut akiitsoqarfiusunik pigisaqartut akiitsui nungutinneqassasut aalajangiunneqarpoq.

Qimagutitinneqarsimasut qaqugu inissinneqaqqissinnaassanersut suli nalunarpoq.