Biilit ukiuni 18-ini misissorneqarsimanngitsut
Nunatsinni biilit misissorneqartarnerisa nakkutigineqartarnerat, danskit akisussaaffigigaat ministerip nassuerutigaa. Taamaakkaluartorli Nunatsinni biillit 1999-imi kingullermik misissorneqarsimapput. Statens Bilsynimi sulisut sisamat Nunatsinnut taamani misissuiartorsimapput.
Nunatsinni biilit misissorneqartarnerisa nakkutigineqarnissaannik immikkut ittumik iluarsiissutissamik Namminersorlutik Oqartussat angallannermullu ministeriaqarfik 2005-imi isumaqatigiinniarsimapput. Inatsisit malillugit pisussaaffiit, Nunatsinni sullivinni suliarineqartarnissaanik Inatsisissatut siunnersuummik isumaqatigiinniarnerit 2012-imi inerneraat.
Akerliliinerilli kingorna, pingaartumik Sulisitsisut taamani akerliupput, inatsisissatut siunnersuut Inatsisartunut saqqummiunneqanngisaannaarsimasoq, angallannermut ministeri akissummini allappoq.
Biilit misissorneqartarnerisa nakkutigineqarnissaannik aaqqiissummik Namminersorlutik Oqartussat siunnersuuteqartussaasimagaluarput.
Atuisut akiligaannik biilit misissorneqartarnissaannik siunnersuutaasimavoq, naalagaaffimmut Namminersorlutillu Oqartussanut aningaasartuutaanavianngitsumik.
Tamannali pinngilaq.
Suliaq ingerlaqqinnissaa siunertaralugu Københavnimi Kalaallit Nunaata Sinniisoqarfia attaviginiarlugu ministerittaaq akissummi allappoq.
