Inersimasunut ilinniarfik nutaaq piareertoq
Ilinniartitaanermut, Kultureqarnermut, Ilisimatusarnermut Ilageeqarnermullu naalakkersuisoqarfiup inersimasunut inuussutissarsiornermik misilittagaqartut ilinniagaqalernissamut GUX-imit nalinginnaasumik ukiuni pingasuni ingerlanneqartartumit sivikinnerusumik ilinniarneqarsinnaalersillugu ilinniagaq nutaaq misiliutitut aallarnisalerpaa.
Ukiunili marlunni ilinniagaqarnerup ukiuni pingasuni ilinniagaqarnermit periarfissaasartut assiginavianngilai. Tamannali naalakkersuisup akisussaasuusup nuannaarneranik annikinnerulersitsinngilaq:
- Ilinniakkap inersimasut inersimasunik allanik peqateqarlutik ilinniarusuttut, ukiunilu pingasuni GUX-ernermit pilertornerusumik ingerlaqqiffiusumik ilinniagaqalernissamut aqqutissarserusuttut pisariaqartitaat naaperiarpai, Doris Jakobsen oqarpoq.
Ilinniagaq nutaaq ilaatigut peqqissaasunngorniarnissamut ilinniartitsisunngorniarnissamullu qinnuteqarnissamut periarfissiisinnaavoq.
Ilinniakkap nutaap siusinnerusukkut piareersaataasumik ilinniartarneq ukiumik ataatsimik sivisussuseqartoq taarsissavaa, ilinniartitsissutigineqartarsimasullu marloriaammik amerlanerussapput ilinniartitsissutissallu qaffasinnerussallutik.
Ilinniagaq nutaaq ilinnut piukkunnarpat ikinnerpaamik 23-inik ukioqassaatit inuussutissarsiornermillu ukiuni marlunni misilittagaqassallutit. Marsip aallaqqaataa nallertinnagu qinnuteqarsinnaavutit.
