Ineriartornermigut innarluutilik sermersuarmik itiviiniartoq

Norgemiut qatanngutigiit marluullutik aappaagu apriilimi sermersuaq itivinniarlugu qinnuteqarnissartik sioqqullugu sakkortuumik sungiusarlutik aallartipput. Angalatuunulli allanut naleqqiullugit, itiviiniarnerminni immikkuullarissuseqarunarput.
Allattoq Carla Davidsen
decembarip 05-at 2011 06:56

Tassa angajulleq, Simen Tannæs-Fjeld, ineriartornermigut annertuumik innarluuteqarpoq, noqartartuuvoq isigiarsuttorujussuullunilu, Norgemi nutaarsiassaqartitsivimmi budstikka.no-imi tamanna allaaserineqarpoq.

Nukaa, 26-nik ukiulik, Lars Martin, itiviinissamut pilersaarusiortuuvoq, taannalu oqaluttuarpoq, ilisimasassarsiornissaq pillugu Danmarkimi oqartussanik oqaloqateqarniarneq ilungersunalaarsimasoq. Simen Tannæs-Fjeld tassaassaaq innarluutilik sermersuarmik nammineerluni itiviisoq siulleq.

- Timikkut taamaallaat unammillernerussanngilaq, sorpassuit mianersuuttussaavavut. Soorlu Simenip nakorsaatitornissaa, inuunilulinnginnissaalu mianersuutigissavarput, nukaa Lars Martin, Norgemi nutaarsiassaqartitsivimmut oqarpoq. Taanna meeqqerivimmi ulluinnarni pisortaavoq.

Qatanngutigiit sermersuarmik itiviinissaminni allanik marlunnik ingerlaqateqassapput - aappaa peqqissaasoq. Itivinniagaat 660 kilometerisut isoqarartutigissaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq