Ineqarnermut tapiissutinut inatsit sukaterneqassaaq
Tamannali Naalakkersuisut inatsimmik allannguinikkut allanngortinniarpaat ukiumullu 12,8 millionit koruuninik sipaaruteqalerlutik. Ineqarnermut tapiissutit aningaasannanniutigineqarsinnaajunnaarnissaat, inatsimmik allannguinikkut siunertaavoq.
Aamma atuaruk Naalakkersuisoq: Inissiat akiminut naleqquttuussapput
Attartortitsisut ineqanermut tapiissutit atorlugit ullumikkut aningaasannanniartartut, Naalakkeersuisut siunnersuumminnut atatillugu allapput. Tassa attartortitamik akii qaffasitsittarpaat, taava attartortut kommunimit Namminersorlutillu Oqartussanit ineqarnermut tapiissutitigut ineqarnermut akiliut tamangajaat akilersittarlugu.
Inatsit maannamut atuuttoq suliarineqarmat, akissakinnerit, soorlu ilinniartut, ineqarnermut akiuliutaasa appasitsinnissaat siunertaavoq. Kisianni inatsit atornerlunneqartartoq, Naalakkersuisut allapput.
Aamma atuaruk Ineqarnermut Naalakkersuisoq inissianik sanaartornialerpoq
Assersuutigalugu attartortitsisoq sisamanik inissiaateqaruni ataaseq 5000 koruuninik qaammammut akilersittarlugu ilinniartunut attartortikkuniuk, ilinniartoq ineqarnermut tapertissaaq, 650 koruunillu taamaallaat qaammammut akilertassallugit. Sinneri 4350 koruunit kommunip Namminersorlutillu Oqartussat akilissavaat.
Tassalu taamaalilluni attartortitsisoq qaammaamut 20.000 koruuninik isertitsissaaq. Taakkunannga 17.400 koruunit pisortanit akilerneqarlutik.
Aamma atuaruk Kalaallit Nunaat uranimik piiaasinnaanngulerpoq
Ineqarnermut tapiissuteqartarnermut atatillugu immikkut piumasaqaasiornikkut, attartortitsisut init attartortittagaat attartorniaraanni tamarmik immikkut qanoq naleqassanersut paasiniarneqartalissapput.
Ineqarnermut tapertittoq ilumut pisariaqartitsisuunersoq aamma misissorneqartassaaq.
Aamma tapiissanerluni naliliinermi maannakkumut naatsorsueriaaseq allanngortinneqassaaq. Tassa tapiiffigineqarusuttoq piffissami qinnuteqarfigisaani aningaasarsiaasa akileraaruteqaataasussat qanoq amerlatiginersut apeqqutaalissaaq. Maannakkut qinnuteqartut ukiup siuliani isertitai apeqqutaasaraluarput.
Aamma atuaruk Asiip Kunuullu mittarfik tallerusuppaat
Tassalu suliffeerukkuit inimullu tapertinnissamut qinnuteqaruit, qinnuteqarnerpit nalaani aningaasarsiatit misissorneqassapput, suliffeqarallaravit aningaasarsiarisimasatit pinnagit.
Taamaalillutik pisariaqartitsinerpaat ikiorneqassapput, inimullu taperneqarnissamut pisariaqartitsinngitsut taperneqartarunnaarlutik.
Inatsimmut allannguutissatut siunnersuut Inatsisartut ippassaq sisamanngornermi siullermeerneqarpoq.
