Ineqarnermut naalakkersuisoq isumasioqatigiisitsinialersoq
Inissiat aserfallassimasut, inissianut akiliutit qaffasissut, aserfallatsaalinissamut tapiissutit kiisalu illunut BSU-nik tapiiffigineqarlutik sanaartukkat, tamakkuupput ineqarnermut naalaakkersuisup upernaap ingerlanerani isumasioqatigiissitsinermi ilaatigut oqaluuseritinniagai.
Knud Kristiansen Inatsisartuni pingasunngornikkut apeqqarissaarfigineqarnermi kingorna taama oqaluttarpoq.
- Inissiat pillugit isumasioqatigiinnissamut aprilip 20-ani ingerlanneqartussamut qilanaartupilussuuvunga. Neriutigaara inatsisartuni oqaluuserineqartut, tassalu inissianik attartortut akiitsoqarnerisa ajornartorsiutaanerat anisitsisarnerillu aamma isumasioqatigiinnermi erseqqissarneqarumaarput, Knud Kristiansen KNR-imut oqarpoq.
Isumasioqatigiinnissamut kommunit, inissiaatileqatigiiffik A/S INI, inatsisartuni sanaartornermut ataatsimiititaliami ilaasortat kiisalu sanaartornermut inissianullu attuumassuteqartut isumasioqatigiinnissamut aggersarneqarput, Knud Kristiansen oqarpoq.
- Neriuppunga isumasioqatigiinnerup kingorna oqarsinnaalluta pingaartumik BSU-mi ajornartorsiutit, aamma illut BSU-nik taasat inissiallu pillugit iliuusissanik nassaarsinnaajumaarluta. Isumaqanngilanga suliassat assigiinngitsut ataatsimoorlugit suliarineqassasut. BSU-mi ajornartorsiutit aamma inissiat attartortittakkat immikkut suliarineqassasut taakkua saniatigut aamma allat soorlu nutaanik sanaartornerit, aserfallatsaalinerit iluarsartuussinerit immikkut suliarineqassapput, Knud Kristiansen oqarpoq.
Qanittumik suleqatigiinnissamik kissaateqarneq
Knud Kristiansenip ilisimalluarpaa, inissiani ajornartorsiutigineqartut tamakkerlugit isumasioqatigiinnermi aaqqinneqarnavianngitsut, taamaakkaluartoq neriuppoq inissianut, illunut sanaartornermillu suliaqartut isumasioqatigiinnermi qanimut suleqatigiilernerannik kinguneqarumaartoq.
Inissiat aserfallatsaalineqarnerat kinguaattoqasoq
- Inissiat aserfallatsaalineqarnissaannut kinguaattooqqasorujussuuvugut ilaatigut 5 milliarder kr angullugit, Knud Kristiansen oqarpoq, tassanngaaniit ajornartorsiut tigunikuuara, aap tassunga killiffeqarpugut taava tassanngaaniit pilersaarusiussaagut qanoq iliornissatsinnut, BSU-mi illut pineqarpata imaluunniit inissiat attartortikkat pineqarpata taakkua ingerlaqatigiittariaqarput, Knud Kristiansen oqarpoq.
