Inatsisitigut ataataqanngitsut pillugit suliaq Sarap akuleruffigaa

Ukiup naannginnerani inatsisissatut siunnersuut Naalakkersuisuusimasut neriorsuutigisimasaattut saqqummiunneqarnissaat, Naalakkersuisunngortunit qaqugu saqqummiunneqarniarnersoq ministerimut akeqquaa. Inatsisissatut siunnersuut aqqutigalugu inatsisitigut ataataqanngitsut assigiimmik pineqarnissaat anguneqartussaavoq taamaalillutik taakku ataataminnik ataataanerullu uppernarsarneqarnissaanut, ilaatigut aqqit pillugit apeqqutit kiisalu ataataasumut kingornussisussaatitaanermut atatillugu ikiorserneqarsinnaaniassammata.

Kalaallit Nunaanni inatsisitigut ataataqanngitsut naalagaaffik ikiorsiullugu qaqugu qanoq iliorluni inatsisitigut ataataminnik ujaasisinnaanngussanersut kiisalu tassunga atatillugu naalagaaffik qanoq ikiuunniarnersoq Sara Olsvigip ilanngullugu paaserusuppaa.

Danmarkimi naalakkersuisunngortut aaqqissuussinerannut atatillugu, Ilaqutariinnermut tunngassuteqartunut inatsisiliorneq, Inatsisinik atortitsinermut ministereqarfimmiit Isumaginninnermut ministereqarfimmut nuunneqarsimavoq, taamaattumillu Isumaginninnermut ministerinngortumut, Karen Hækkerupimut Sara Olsvig apeqquteqarluni.