Inatsisitigut ataataqalernissaminnut pisinnaatitaaffilerneqartussanngorput
Meeqqat inatsisitigut ataataqanngitsut pillugit suliaq 2010-mi aallartippoq, Ane Sofie Hardenbergip atuakkiaata Ataatamik ilungersuuteqarnerup, kalaallit meerartaannik aappariinnerup avataatigut inunngorsimasunik samminnittoq saqqummersinneqarmat.
Sammineqartumut atatillugu meeqqat nunatta kitaani 1963 sioqqullugu inunngorsimasut kiisalu Avanersuarmi Tunumilu 1974 sioqqullugu inunngorsimasut ataataqarnissaminnik imaluunniit ataataminnik kingornussisinnaatitaannginnerat saqqummerpoq.
Meeqqat inatsisitigut illersorneqarnissaat pillugu inatsit 1963-imi aamma 1974-imi akuersissutigineqartoq siumuinnaq isigisuummat.
Tamannali maanna allanngortinneqassasoq, Inatsisinik atortitsinermut ministeeriaqarfik taama nalunaarpoq, ataataviusunullu tassanngaannartumik meeqqamut ukiorpassuit qaangiuttut qitornartaarisimasamut akisussaatinneqarnissaq pineqartumut innimiilliornerussanersoq eqqarsaasersuuteqarsimavoq. Kisianni:
- Meeqqap kina ataataginerlugu paasisaqarusunnera tamatumalu kingorna kingornussisussaatitaanermut pisinnaatitaanera nalilersuinermi oqimaalutaanerusut, ministeeriaqarfik naalakkersuisut siulittaasuannut allappoq.
Nalunaarut peqatigiiffik Ataatamit nuannaarutigineqarpoq:
- Kiisami. Maanna ukiut 50-it sinnerlugit utaqqereersimavugut naammagittarnerlumi naggataatigut akilerneqarpoq. Maanna sutigut tamatigut neriuutissaqalerpugut, siulittaasoq Tida Ravn oqarpoq, kisiannili tassunga atatillugu mianersoqqussutigaa, ataatat nassaarineqarniarneranni rigsombudsmandeqarfimmiut sulisunik immikkut atorfissaqartitsissammata, taamatullu eqqartuussivinni ulapputaagaatsialersussaassallutik.
Ulloq manna tikillugu meeqqat inatsisitigut ataataqanngitsut qasserpiaanerat ilisimaneqanngilaq, misissuinerilli kingulliit takussutissaqartippaat 1973-imi inuusut 56 procentii uersagaasut.
Inatsisissamut nutaassamut siunnersuut Danmarkimi Inatsisinik atortsinermut ministeriaqarfiup piareerlugu suliaralugu ukioq manna naalerpat saqqummiunneqarnissaa naatsorsuutigaat. Ataatassarsiuussinermi ataataasoq toqukkut qimagutereersimappat kingornussiassallu ilaqutaannut agguaanneqareersimappata suliaq aallaqqaataaniit aallarteqqinneqassanngitsoq, tministeriaqarfimmit nalunaarutigineqarpoq.
