Pinngitsaaliilluni atoqateqarneq: Inatsisit sanngiippallaaqaat. Pillaasarnermut inatsiseqartariaqarpugut, inuusuttut partiiat isumaqarpoq

Pinngitsaaliilluni atoqateqartarnermut pillagaanerup sakkortunerulernissaanut piffissanngorpoq. Angusaqarnarnerusumik pitsaaliuissagutta pillaasarnermut inatsit aqqutaasinnaavoq pineqaatissiissummik inatsimmut taarsiullugu, inuusuttut partiiat isumaqarpoq.

Allattoq Nicole Sander Bertelsen

septembarip 28-at 2023 12:50

Nutserisoq Per Rosing

- Sakkortuumik iliuuseqarnissamut piffissanngorpoq, kinguaassiuutitigut pinerluttuliortarneq pimoorullugu akiussagutsigu, Atassummi inuusuttut partiiat isumaqarpoq.

Tusagassiuutinnut nalunaarummi saqqummiunneqarpoq, partiillu siulittaasua Angutinnguaq Schmidt KNR-imut itisiliivoq:

- Taama amerlatigisunik pinngitsaaliilluni atoqateqartarneq pitsaaliortissagutsigu sakkortunerusumik kinguneqartariaqarpoq. Tamanna sakkortunerusumik pillarneqarnermik kinguneqassaaq.

Naatsorsueqqissaartarfimmiit kisitsisit takutippaat siorna kinguaassiuutitigut pinerluttuliornernik taaneqartartut nalunaarutigineqartut 594-iusut. Tassa pinerluttuliornerit kinguaassiuutinut tunngasut soorlu kannguttaatsuliornerit, pinngitsaaliilluni atoqateqarnerit, ukiukitsunik atoqateqarneq, qanigivallaakkamik atoqateqarneq aamma meeqqanik pornografi.

KINGUAASSIUUTITIGUT PINERLUTTULIORNERIT AMERLASSUSAAT

Naatsorsueqqissaartarfik naapertorlugu siorna kinguaassiuutitigut pinerluttuliornernik taaneqartartut 594-it nalunaarutigineqarput.

Taakkunannga 235 inunnik 15 sinnerlugit ukiulinnik pinngitsaaliilluni atoqateqarnermut tunngasut nalunaarutigineqarput.

Meeqqanik 15 inorlugit ukiulinnik pinngitsaaliilluni atoqateqarnermik nalunaarutigineqartut 57-iupput.

2021-mi inunnik 15 sinnerlugit ukiulinnik pinngitsaaliilluni atoqateqarnermik nalunaarutigineqartut 596-iupput.

Inunnik 15 inorlugit ukiulinnik pinngitsaaliilluni atoqateqarnerit 54-it nalunaarsorneqarput.

Aamma atuarukInatsit nutaaq suliarineqalerpoq: Meeqqanik inuusuttunillu pinngitsaaliilluni atoqateqarneq sakkortunerusumik pineqaatissiissutigineqartalissaaq

Kalaallit Nunaanni pineqaatissiissummik inatsit atuuppoq. Pillarneqarnermut inatsimmit allaaneruvoq. Pineqaatissiinermi eqqarsaataavoq inuiaqatigiit suliniuteqassasut pinerluttup kissaatigineqartumik ineriartornissaa siuarsarniarlugu. Tassaasinnaavoq nakuuserneq pissutigalugu eqqartuunneqarsimasoq. Pineqaatissiissut taassavoq pineqaatissinneqartunut inissiissarfimmut inissinneqarneq – kisianni inissiisarfik ammasuuvoq, eqqartuunneqartorlu ulluunerani sulisinnaavoq soraarunilu inissiisarfimmut uterluni.

Kisianni Kalaallit Nunaat pillaasarnermut inatsiseqartariaqarpoq, inuusuttut partiiat isumaqarpoq. Tassami pinngitsaaliilluni atoqateqartarnerit amerlavallaaqaat.

- Pineqaatissiinermik inatsit massakkut atuuttoq kissaatigineqartutut sunniuteqanngippat sakkortunerusumik inatsiseqartariaqarpugut. Pinngitsoornata pillaasarnermut inatsiseqartariaqarpugut sunniuteqarnerusumik pitsaaliuissagutta, inuusuttut partiiat tusagassiuutinut nalunaarummik allappoq.

Ajornartorsiut angeqaaq

Taamaattumik kalaalit inatsisartui Danmarkimi Folketingimut piumasaqaateqartariaqarput pinngitsaaliilluni atoqateqartarnermut sakkortunerusumik pillaateqarnissaq pillugu periarfissanik misissueqqullugu, Angutinnguaq Schmidt isumaqarpoq.

- Nunami maani amerlavallaanngilagut, kisianni pinngitsaaliilluni atoqateqartarneq qiviarutsigut ajornartorsiut angeqaaq, taamaattumillu sakkortuumik iliuuseqartariaqarpugut, oqarpoq.

Taamaattumik inuusuttut partiiata massakkut sakkortunerusumik pillaateqartarnissaq siunnersuutigaa.

Ajornartorsiut siorna februaarimi Folketingimi qaqinneqarpoq, meeqqat inuusuttullu pinngitsaalillugit atoqatiginerinut inatsisit ataatsimoortut suliarineqarmata Naalakkersuisut aamma danskit naalakkersuisui isumaqarmata pillaatit sakkortunerusariaqartut. Inatsisissatut siunnersuummi allassimavoq pillaatigineqartut 50 procentumik qaffatsinneqassasoq.

PINEQAATISSIINEQ SUUA?

Kalaallit Nunaanni Eqqartuussisiveqarneq assigarlalitsigut danskit eqqartuussiveqarneranniit allaaneruvoq.

Ilaatigut pinerlunneq pillugu Kalaallit Nunaanni inatsimmi pillagaaneq taaneqanngilaq, soorlu aamma pillagaanermi killiliunneqartut ilaanngitsut.

Taarsiullugu pineqaatissiinerit arlaliupput, taakkulu pillugit pineqaatissiissut pinerluttup pinerloqqinnginnissaanut naleqqunnerpaaq eqqartuussisut toqqarsinnaavaat.

Pineqaatissiissutit eqqartuussisut toqqarsinnaasaat tassaapput: Mianersoqqussut, akiliisitaaneq, eqqartuussut pinerloqqinngikkaanni naammassineqartussanngitsoq, nakkutigineqarneq, inuiaqatigiinnik sullissineq, nakkutigineqarneq aamma (sivikitsumik) pineqaatissinneqartunut inissiivimmut inissinneqarneq ataqatigiissillugit, pineqqatissinneqartunut inissiivimmut inissinneqarneq aamma piffissami aalajangersimanngitsumik tigummineqarneq.

Aamma immikkut ittunik pineqaatissiissuteqarpoq pinerluttunut inuusuttunut aamma pinerluttunut tarnikkut napparsimasunut.

Tigusiffik: Pinerluttunik isumaginnittoqarfik

Ullumikkut pinerluttoq ukiut 2,5-t aamma 3,5-it akornanni inummik 18 inorlugit ukiulimmik kinguaassiutitigut innarliisimaguni pineqatissinneqartarpoq, inatsisilli allanngortinnerisa kingornatigut ukiut 3,5 aamma 5 akornanni nammineersinnaajunnaarsitsineqartalissaaq.

- Neriuutigaara inatsisissatut siunnersuutip kingunerissagaa siunissami kinguaassiutitigut innarliisarnerit ikilisissagai taamalu Kalaallit Nunaanni meeqqanut inuusuttunullu allannguilluni, taamani inatsisit atuutsinneqarnerannut ministeri Nick Hækkerup (S) oqarpoq.

Inuusuttut partiiat isumaqarpoq pinngitsaaliillutik atoqarsimasut tamarmik sakkortunerusumik pillaatisisariaqartut.

Danmarkimut allartillugit

Pinngitsaaliilluni atoqateqarnermut pillaat qanoq annertunerutigissanersoq pillugu Angutinnguaq Schmidt aamma Atassut erseqqissumik taasaqarsinnaanngillat, kisianni isumaqarpoq eqqartuunneqartut Danmarkimut aallartinneqartariaqartut pillaatisiartik naammassiartorlugu qaavatigullu Kalaallit Nunaannit atajuartussamik anisinneqassasut.

- Kalaalit Nunaanni pineqaatissinneqartunut inissiivinni inissaqartitsinngikkutta, taava pillarniartigit Danmarkimut nassiullugit taamalu maannga peerlugit Kalaallillu Nunaannut qaqugulunniit uteqqinnissat inerteqqutigalugu, oqarpoq.

Danmarkip ilanngutitinneqarneranut pissutaavoq eqqartuussisoqarneq Kalaallit Nunaanni Namminersorlutik Oqartussanit tiguneqanngimmat. Ima isumaqarpoq tamatumunnga akisussaaffik pingaarnerusumik danskit oqartussaasuiniimmat.

Sulinikkut kingunerissavaa danskit oqartussaasuisa, danskit eqqartuussisoqarnermut ministereqarfiata aamma Aatsitassanut, Inatsisillu Atuutsinneqarnerannut Naalakkersuisoqarfiup akornanni suleqatigiinnikkut tamanna pillugu Kalaallit Nunaanni atuuttussamik inatsisiliortoqassasoq