Assi: Peter Vest

Inatsisip oqaasertai pissutigalugit timersortartut tapiiffigineqanngitsoortartut

Aningaasanut inatsimmut ukiut tamaasa 250.000 koruunit kalaallinut timersortartunut atorneqartussatut immikkoortinneqartarput. Kisiannili affaanngitsulluunniit atorneqartarput. Inatsisip oqaasertalerneqarnerata nutaap tamanna allanngorteriassavaa.

Nunanut allanut unamminerit nunallu tamalaat akornanni kalaallit inuiaattut qalipaataat atorlugit peqataaneq akisusinnaavoq. Aningaasanut inatsimmi kontop timersortartut aningaasatigut ikiorsinnaaneranik periarfissaqartittussaavai assersuutigalugu suliffiminnit sulinngittariaqarneranni. 250.000 koruunilli affaanit annikinnerit ukiut tamaasa atorneqartarput.

Kulturimut, Ilinniartitaanermut, Ilisimatusarnermut Ilagiinnullu ataatsimiititaliap Demokraatinit, Nivi Olsenip siunnersuutaanik oqallisiginnittut, isumaliutissiissutaat taama allassimavoq.

Nivi Olsenip kalaallit timersortartut qanoq taperserneqarsinnaanerunerat misissorusuppaa. Timersortartulli ikiornissaannut periarfissaqareerpoq.

Tamannali tamatigut pinngitsoortarpoq, tassa inatsip oqaasertaa timersortartunut De Olympiske Legenut, nunarsuarmi pissartanngorniuunnernut, Europami pissartanngorniuunnernut, Amerikap nunavittaani pissartanngorniuunnernut World Cupsimulluunniit peqataaniartunut kisimi tunngavoq.

Timersortartunut tapiissutit

2013: Qinnuteqartunut qulinut 101.000 koruunit

2014: Qinnuteqartunut qulinut 101.000 koruunit

2015: Qinnuteqartunut aqqaneq-marlunnut 118.800 koruunit

2016: Qinnuteqartunut aqqaneq-pingasunut 130.650 koruunit

Sungiusarnermillu unamminernut, Arctic Winter Gamesimut, Island Gamesimulluunniit taperneqarnissaq periarfissaanngitsoq, Naalakkersuisut ataatsimiititaliamut paasissutissiivoq.

Inatsisilli oqaasertaa allanngortinneqarpat timersortartut, sulinngiffeqartariaqartut ilinnianngikkallartariaqartulluunniit pitsaanerusumik taperneqarsinnaalissapput, taamaalilluni aningaasat 250.000 koruunit siunertamut ukiut tamaasa immikkoortinneqartartut atorneqarnerusinnaalissapput.

Taamaammat Kulturimut, Ilinniartitaanermut, Ilisimatusarnermut Iligiinnullu ataatsimiititaliap Nivi Olsenip tamatumanik misissuerusunnera itigartittariaqarsoraat.

Ataatsimiititalialli naalakkersuisoq Kalaallit Nunaanni Timersoqatigiit Kattuffiat, Elite Sport Greenlandilu suleqatigalugit timersortartut amerlanerusut, suliffimminnit annaasaqartartut taperserneqarnissaata periarfissinneqarnissaanut inatsip oqaasertaa allanngortissagaa kaammattuuteqarfigaa.

Isummersuutit

inatsisartut_forarssamling_2017_nils_baum_bureau_for_inatsisartut.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!