Mimi Karlsen: Inatsisartut tuaviuussamik suliat itigartitsissutigisinnaavaat

Tuavisuussilluni inatsisiliortoqartarneraalluni isornartorsiorneqarnera Inatsisartuni siulittaasuugallartup Mimi Karlsenip paasinarnerarlugu, KNR-imut oqaatigaa.
novembarip 28-at 2017 13:13

- Suu, ilaana paasinartorujussuuvoq. Aamma taamatut misigisoqarsimappat aammalu taamatut ittoqarpat tusaatissatut tigussavarput, taavalu aamma periarfissat suusinnaanersut pinngitsoortiniarnermut ilasariaqarnersut misissorsinnaavarput, Mimi Karlsen KNR-imut oqarpoq.

Inatsisissanik suliaqarneq, soorlu aalisarneq imigassarlu pillugu inatsissat tuaviuussamik piareersarnertaqarpianngitsumillu suliarineqarnerarlugit, Transparency International Greenland, Nivi Olsen Hans Enoksenilu isornartorsiuipput.

Tuaviuussamik sulisoqassatillugu Naalakkersuisut Inatsisartullu siulittaasoqarfiata oqaloqatigiissutigisaraat, Mimi Karlsenip oqaatigaa.

AAMMA ATUARUK Tuaviuussamik inatsisinik suliaqartarneq ernummatigineqartoq

Siunnersuutit politikerinit suliarineqalertigatik piffissaalluartukkut saqqummiunneqartarnissaat, Inatsisartut siulittaasoqarfiata Naalakkersuisunut erseqqissaraat, siulittaasup oqaatigaa.

Tuaviuussamik suliat itigartitsissutigisinnaagaat  

Inatsisartut siunnersuut paasissutissanik pingaartunik amigaateqarsorigunikku piareesarnissaamulluunniit piffissakigigunikku suliarinissaa itigartitsissutigisinnaagaat, Mimi Karlsenip erseqqissarpaa.

 - Inatsisartut amerlanerussuteqartut aalajangertarput suliaq taanna ikkarnaateqarnersoq imaluunniit suliaralugu nanginnissaa qanoq issanersoq taamaammat amerlanerussuteqartut aalajangertarput una suliaq taamatut ittoq taamaalillugu naammassisinnaavarput, Mimi Karlsen taama oqarpoq.

Naalakkersuisunut ilaasortat Kim Kielsen Sara Olsvigiluunniit apersorneqarumanngillat.