Inatsisartut tallimanngorpat inissitsiteriffiusumik ataatsimiissapput

Inatsisartut inissitsiteriffiusumik aqaguagu tallimanngornermi decembarip aqqaneq-aappaani ataatsimiinnissaat maanna qularnarunnaarpoq.

Naalakkersuisunut ilaasortanngortut ataatsimiinnermi pisortatigoortumik akuerineqartussaapput, taamatuttaarlu Inatsisartuni ataatsimiititalianut, aalajangiisartutut ataatsimiititalianut siunnersuisoqatigiinnullu ilaasortat Inatsisartunit toqqarneqartussaapput.

Ileqquusorlu malillugu, inissitsiteriffiusumik ataatsimiinneq Inatsisartunut ilaasortat Namminersorlutillu Oqartussani atorfilittat qullersaasut Hans Egedep Illuani ullaakkorsioqatigiittoqassaaq. Tassanngaanniillu Annaassisitta Oqaluffianut ingerlaaqatigiittoqassaaq nalunaaqutarlu qulinut naalagiaqatigiittoqassalluni. Nalunaaqutaq aqqaninngorpat inissitsiteriffiusumik ataatsimiinneq aallartissaaq, ataatsimiinnissarlu nalunaaquttap-akunnerinik marlunnik sivisussuseqartussatut tagginneqarsimavoq - tassa nalunaaqutaq ataatsip tungaanut.
 
Ataatsimiinneq Inatsisartuni sivisunerpaamik ilaasortaasimasumit ammarneqassaaq, tassalu maanna Inatsisartut siulittaasorigallagaannit Siumumeersumit 68-inik ukiulimmit Lars-Emil Johansenimit.
 
Taassuma Inatsisartunut ilaasortanngortut 31-usut qinersineq pillugu nassuiaateqarfigissavai, ilaasortatut sinniisussallu qinigaasut akuersissutigineqarnissaannik Qinigaanerup misilinneqarnissaanut ataatsimiititaliaaagallartup inassuteqaataa saqqummiutissallugu.
 
Aammattaaq Inatsisartunut ilaasortaanngitsut Naalakkersuisuni ilaasortassatut siunnersuuteqartoqassappat tamanna Inatsisartunit akuersissutigineqassaaq. Tamatuma kingorna Inatsisartut siulittaasuannik siulittaasoqarfimmilu ilaasortanik toqqaasoqassaaq, kingornalu Naalakkersuisut siulittaasussaannik Naalakkersuinullu ilaasortat sinnerinik qinersisoqassalluni.
 
Inatsisartut oqaluuserisassanut ataatsimiititaliarigallagaanit aamma aalajangerneqarpoq inissitsiteriffiusumik ataatsimiinneq ullormik ataatsimik immikkut ittumik ataatsimiiffiusumik sivitsorneqarumaartoq, tassalu marlunngornermi decembarip 16-iani, naalakkersuisunit oqaluuserisassat ataasiakkaat kingusinnerusukkut ataatsimiinnissamut kinguartinneqarsinnaassagunanngimmata.
 
Inatsisartunut ilaasortanngortut Inatsisartuni taasititseriaatsinik suleriaatsinillu allanik tallimanngornermit marlunngornermut  pikkorissartinneqassapput.

Isummersuutit

inatsisartut_forarssamling_2017_nils_baum_bureau_for_inatsisartut.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!