KNR pillugu Inatsisartut siusinnerusukkut katersuuttarnissaat uissuummissutaavoq
Inatsisartut upernaakkut ataatsimiinnermi katersuuttarnitik siuartippaat, ullaakkut nalunaaqutaq quliniit aallartittassallutik marlunullu unittassallutik. KNR-illi aallakaatitsinernik pilersaarutini qangali aaqqereersimagamigit, Inatsisartut ullormut katersuuttarnerinit aallakaatitsisinnaanngilaq.
- Taassuma nalaanut KNR aallakaatitassioreernikuuvoq, ukiarli, qanoq isikkoqassasoq. Aamma ataatsimiinneq taamatut aallakaatissagutsigu, kipisaqattaartumik, naleerutissooq, KNR-ip pisortaa Karl-Henrik Simonsen oqarpoq.
Ataatsimiinnerilli malinnaaviginiaraanni allanik periarfissaqarluareersoq taassuma erseqqissaatigaa, ataatsimiinnerimmi KNR2-kkut isiginnaarneqarsinnaapput tusarnaarneqarlutillu.
- Pilersaaruteqarnerup saniatigut Oqalliffikkut, assigiinngitsut aallakaatittakkagut politikerit qaaqqullugit imaluunniit ataatsimiittarfiannut ornillugit apersuisarnerit itisiliisarnerillu, taakku Qanoruukkut Radioaviisikkullu ingerlaannassapput, pisortaq oqarpoq.
Aamma atuaruk Inatsisartut upernaakkut ataatsimiinnerat radiukkut aallakaatinneqassanngilaq
KNR-ip taamatut aalajangernera pissusissamisoortoq, tusagassiortunngorniat ilinniarfianni pisortaq, Naja Paulsen, isumaqarpoq.
- Tamat oqartussaaqataanerat eqqarsaatigalugu soorunami naalaartartut ilaasa maqaasinngitsoornavianngilaat taamatut periarfissamik annaasaqarnissartik, Naja Paulsen oqarpoq, nangillunilu:
- Kisianni tusagassiorfittut ineriartortitsineq eqqarsaatigalugu allanik periarfissaqarpat, taava aamma aallakaatitsisarneq piffissaq taanna allamut atorneqarsinnaavoq iluatinnartunik aallakaatitsinermut.
Ataatsimiinnerit TV-kkut KNR2 atorlugu toqqqaannartumik aallakaatinneqassapput nittartakkanilu inatsisartut.gl-imi knr.gl-imilu isiginnaarnissaat aamma periarfissaalluni.