Tillie: Inatsisartut ataatsimiittarfiat 300 millionilik sussagatsigu?

300 mio.kr.

Inatsisartut ataatsimititarfissaat nutaaq sananeqassappat taama akeqassaaq. Aningaasalli taakku allanut atorneqarsinnaagaluartut Demokraatit isumaqarput. 

- Demokraatiniit Inuit Ataqatigiit kaammattorusuppagut aalajangiveqqullugit - suliamullu tapersersuinertik unitsillugu, Demokraatit aningaasaqarnermut oqaaseqartartuat Tillie Martinussen tusagassiuutinut allappoq. 

- Demokraatini qularinngilarput ataatsimoorluta allamik suliniummik tapersersoruminarnerusumik nassaarsinnaasugut, Martinussen allappoq suliniummilli erseqqissumik ataatsimoorfiusinnaasumik taasaqarani. 

Taassuma allagaqarnermini erseqqissarpaa Inuit Ataqatigiit Siumullu Inatsisartut nutaamik ataatsimiittarfittaarnissaanik tapersersuisuusut, naak innuttaasut amerlasuut akerliugaluartut. 

Aamma atuaruk IA: Ataatsimiittarfissaq ullormi ataatsimi aalajangiiffigineqassanngilaq

Suliaq suli aalajangiiffigineqanngitsoq

Tillie Martinussenip Inuit Ataqatigiinnut kaammattuinera tunngavissaqanngitsoq Inuit Ataqatigiinnit isigineqarpoq. 

- Inuit Ataqatigiinninngaanniit suliaq suli aalajangiiffiginngilarput aamma tapersersorlugu oqarnikuunngilagut. Suliaq Inatsisartut aallartereernikuummassuk isummerfigineqaqqinnissaa uagut siunnersuutigivarput, Inuit Ataqatigiit siulittaasuata tullia, Aqqaluaq B. Egede, KNR-imut oqarpoq. 

- Ataatsimiittarfissaq piumavissimasuugutsigu Aningaasanut Inatsimmut ilanngunneqarnissaa piumasarisimassagaluarparput, Egede oqarpoq. 

Ipertisaarineq unitsilli

Aqqaluaq B. Egede isumaqarpoq Demokaatit nukiit politikkernissamut atortariaqaraat. 

- Inuit Ataqatigiit suliamut akuersereersimasutut oqaatigineqarneri eqqortuunngilaq. Demokraatit ipertisaarinertik unitsittariaqarpaat nukiillu politikkernissaminnut atorlugit, Aqqaluaq B. Egede oqarpoq. 

Tillie Martinussenip Inuit Ataqatigiinnut kaammattuinermini oqaatigaa suliniutinik allanik naapiffiusinnaasunik ujartuisoqassinnaasoq. 

Tassungalu atatillugu Demokraatit politikkikkut oqallinnermut akulerutiinnartariaqartut Aqqaluaq B. Egede isumaqarpoq. 

- Suliniutit arlallit naapiffigisinnaasimassavagut. Aningaasanut inatsisissaq isumaqatigiinniutigineqarpoq, politikkikkut oqallittoqarpoq taakkulu ulapputiginerinut Demokraatit akuliutiinnartariaqarput, Egede oqarpoq. 

IA suliamut akuersereernikuusoq

Tillie Martinussenip Inuit Ataqatigiinnut kaammattuinera ipertisaarinerunngitsoq inuttaata oqaatigaa. 

- Siumukkut isumaat allanngortinniarlugu sunnerniarnikuugaluarpagut. Taakkuli nutaamik ataatsimiittarfittaarnissaq aalajangiusimavaat, Tillie Martinussen KNR-imut oqarpoq.

- IA-kkut kaammattorpagut neriulluta partiip innuttaasut 2014-imi ataatsimiittarfittaarnissamut akerliusut tusaaniassagaat. Aamma isumaqaratta partiip isumaa allanngoqqajaasoq, Martinussen naggasiivoq.  

Taassuma aamma eqqaamaqquaa Inuit Ataqatigiit Inatsisartut ataatsimiittarfittaarnissaannut isumaliutissiissummik 2013-imeersumi akuerseqataanikuusut.