Inatsisartut ataatsimiinnerat qilaatersornermik ammarneqartalissagunartoq
Inatsisartuni ukiaanerani ataatsimeeqqaarfimmi nutaamik ileqquusumik qilaatersortoqartalernissaa,
Inatsisartut siulittaasoqarfianni sapaatip akunnerata siuliani isumaqatigiissutigineqarpoq. Inatsisartut siulittaasuat Lars Emil Johansen siunnersuummut aamma ilaliivoq.
Inatsisartut ataatsimiittarfianni qilaatersortalernissaa qilaatersortartumit, Leif Saandvig Immanuelsenimit siorna ukioq naalersoq siunnersuutigineqarpoq.
Maannalu ileqquulersussamut ukiaanerani ataatsimiittoqalinngilaattaani maleruagassiornissaq siulittaasoqarfiup suliarisussanngorpaa.
- Isumaqarpunga tulluassasoq Inatsisartut ataatsimiinneri kalaallit ileqqutoqaannik aallarnerneqartalertuuppata, tamanna pisinnaavoq ileqqut ataqqisaanerat ilaat atorlugu - ataqqeqatigiinneq oqallinnerlu ileqqorissaarfiunerusoq pisinnaassammat, Leif Saandvig Immanuelsen AG-mut oqarpoq.